tgoop.com/mohaneedatea/652
Last Update:
قصيدة استشهاد الامام علي عليه السلام
تقره اليا علي بوجوه الأيتام
وديره تفرهدت ومطشره احلام
راح الچان ابوهم راح
ظلت بس دمع ونياح
--------------------------------------
موسفره ويرد وتگول ذكره وتنسي بنسيان
ركن الله انهدم ياناس غفله وطبروا الاذان
بيت الله اختنگ ويصيح يمي وطبروا القران
وذيج الليله شايب صاح مات اليندل العميان
يفتر والحزن ديره اعله ديره
طايح وانكتل شيخ العشيرة
ظل حزن اليتامه اصياح
ظلت بس دمع ونياح
----------------------------------------
فجر الله اليطرونشوف راس القبله هم مطبور
خطوات الذبح لحسين منهه امتدت لعاشور
نفس الفكره والتاريخ بس بيهه اختلاف الدور
المامات بحرب ويموت مات بسجدته ومغدور
قائد واليتامه مشيعينه
فجر الله اليطر ميت علينه
يابويه رزقكم طاح
ظلت بس دمع ونياح
------------------------------------------
جابتهه اليتامه الطوس رجعت كلشي مابيهه
مات الچان ابوهم مات ياهو الطاسه يمليهه
وزينب بالدموع اتفيض راح الچان واليهه
البنت إبلا ابوهه تعيش هايه الدنيا تاذيهه
مدرار الدمع ياناس مدرار
ميت والفرح مايدخل الدار
وشلون الجرح يرتاح
ظلت بس دمع ونياح
------------------------------------
اتصور من يچن الليل وتغفه الوادم اليمك
وابوك الميت ومدفون ونامت بالگبر امك
المن تشكي همك وين وحدك تگعد بهمك
وحشه تحسه كل البيت من خوفك نشف دمك
وحالة زينب الكرار ياحال
مات أمه وابوهه والدمع سال
ميت للگلب سباح
ظلت بس دمع ونياح
--------------------------------------
بذيج اللحظه شنهي حسين شنهي الصاير بحاله
منهو اليمسح ادموعه وياهو بصفه يبراله
مات الراعي لهل البيت فخر ال النبي واله
علينه الميت ومشيول جبريل النعش شاله
وأملاك السمه وجبريل جناز
العزيز تشيعه من يموت الاعزاز
مشيول النعش بجناح
ظلت بس دمع ونياح
--------------------------------------------
عمود الخيمه لمن الطاح گلي شيلزم الخيمه
مثل التيهه وعطشان وحده ويفتر بهيمه
الله يساعد المشتاگ محد يعرف بظيمه
علي الغيم اعله روس ايتام مات وراحت الغيمه
ذيچ الليله چانت ليلة افراگ
مشتاگ ويودع بيده مشتاگ
ياربي الحزن شوفاح
ظلت بس دمع ونياح
خادم رقية عليها السلام
الشاعر مهند الدريساوي
BY الشاعر مهند الدريساوي الرسمية
Share with your friend now:
tgoop.com/mohaneedatea/652