قصيدة الاكبر
.
.
.


خويه حاچيني يالاكبر .. وجهك اشبي شو تغير
بهالحــاله ماشـفتـك گــبل
يـلي غفــيت اعـــله الرمل
گوم امسح اعيوني التهل
عليك

****

ليش ساكت .. خويه اگـعد فـدوه بس حاچيني
ليش ساكت .. بالجــروح التــوجــعـــك دليـــني

رقيه اويـاك تچـجي افــتح اعيونك
يبــعد اعــيون اختك ياعـلي شلونك
شبيك اصفر يخويه ومنخطف لونك
سولـفلي لچــن ســـولف علــى هونك

يبو احچايات المريه .. تروحلك فــدوه رقيه
والسكــتتك ماضــل عـگل
يـلــي غفــيت اعلـه الرمل
گوم امسح اعيوني التهل
عليك

******

صدرك اشبيه .. ليـــش ما تـــگــدر تــجــر انــفاسك
صدرك اشبيه .. الخيل بس لا من طحت هم داسك

بصــدرك بيـدي الزغــيرونه اتلــمس
اضلوعك صايرات اطحين اتحسس
حافـر خــيل چـــنه ابـصدرك اتونس
الچـمك مــا اگــلك ياعــلـي اتــنفس

اتحيرت بيمن اداويك .. وخاف الزمنك وأئذيك
گمت انه احس بيدي ثگل
يــلي غـفيــت اعلــه الرمل
گوم امسح ادموعي التهل
عليك

***

آ يجرحك .. بالـكـــبر ياخــويــــه اكبــر منـــي
آ يجرحك .. يارقــيه ايــگــلي حيــلــچ ونــــي

كلما شوف جرحك ابـچي واتحسر
واحس ابگلـبي نابـت ياعلي خنجر
جسمك ليش هيچي يالاخو اموذر
چــــن ياخوي ثــار ايطلبك العسكر

خدي بدموعي حفرته .. ابوجهك الدم من نظرته
وبراســي لامـاضــل عـگل
يــلي غفــيت اعــله الرمل
گوم امسح اعيوني التهل
عليك

***

ها يخويه .. هــيچ اشــوفك ماچنـــت اتــوقع
ها يخويه .. الگـه جسمك عــالتـراب امكــطع

افكـر بيك ابـچي گاعــده اگبالك
واتـــرجــــاك لا يــتــــــأذه دلالك
اذا ياخوي هيج مكطعه اوصالك
ابويه حسين بــيمن يالاخو شالك

هذا مامعقوله حالك .. ياهو المطشر جمالك
ماحــَسبت هـيچـي تضل
يــلي غفــيت اعله الرمل
گوم امسح اعيونيالتهل
عليك

****

مامصدگه .. بعد طــولك ماتـشوفه اعيوني
مامصدگه .. اخــت الاكــبر بــعد ميـسموني

يــالِـــمــدد يالمــگــطع يالمـــدمه
نحــرك ياعلي خلــيـــني اشـــتمه
تره ابلـياك اخـتــك يالاخــو تعمه
چنت نعمه يخويه وراحت النعمه

يالدلالك مــاكو مـنه .. يالــذي اتنكط مـحنه
الهالـفرگه عگلــي منشغل
يــلي غفــيت اعلــه الرمل
گوم امسح اعيوني التهل
عليك
****
حيدر تركي الكربلائي

#قصائد_الامام الحسين ع
قصيدة لليلة الوداع لسان السيدة زينب ع

الوداع الوداع يا حبيبي يا حسين
الوداع الوداع يا حبيبي يا حسين

*******************
رايح و عني امان الله بٓعد
وداعة الله و ادري ما ترجع بعد
زينبك يا روح زينب و الجسد
شلون بيه لو شمر صدر صعد

الوداع الوداع يا حبيبي يا حسين
الوداع الوداع يا حبيبي يا حسين
*******************
شلون بيه خلاف عينك من تروح
خوية وازدحمت على كلبي الجروح
بيه حسرة و بيه عبره و عندي نوح
ريت كون بزينبك ما تبقى روح

الوداع الوداع يا حبيبي يا حسين
الوداع الوداع يا حبيبي يا حسين
*******************

يعينك الله چيف الك ما ظل معين
وداعة الله يا حبيبي يا حسين
ريت عيناي انعمت خويه الثنين
و لا اشوفك حاير و تصفك لادين

الوداع الوداع يا حبيبي يا حسين
الوداع الوداع يا حبيبي يا حسين

*******************

من على التله بعد ساعة اعتنيك
خوية بس شلون جيه راح اجيك
راح اعاين عالشمر كاعد عليك
و انظر بعيني گطع خنصر اديك

الوداع الوداع يا حبيبي يا حسين
الوداع الوداع يا حبيبي يا حسين

*******************

من عگب عباس ما ظل بيه حيل
نار كٓبره و مؤلمة نار الكفيل
و الصبر ما منه ظل بس شي قليل
شلون اشوفن چثتك تسحكها خيل

الوداع الوداع يا حبيبي يا حسين
الوداع الوداع يا حبيبي يا حسين
*******************

خوية بعدك اصطبر من يا الالم
و اعله ستر الله تشب نار الخيم
حيل صبري خويه عالتلة انهدم
بالبراري فزعت اطفال و حرم


الوداع الوداع يا حبيبي يا حسين
الوداع الوداع يا حبيبي يا حسين
*******************
علي حسين الكناني

#قصائد_الامام الحسين ع
وداع زينب والحسين


رايح للمنية ولاتخليني
اخذ روحي يبو السجاد اخذ عيني
*1*********
من يوم الضلع والباب والعصر ه
وصتني الشفيعة فاطمة الزهر ه
قبلي حسين يازينب على صدر ه

وشميلي النحر جانت توصيني
اخذ روحي يبو السجاد اخذ عيني
2********
اذا سهم المثلث صوبك يحسين
منو الهاي اليتامه ياضو ة الكل عين
اذاهجمت علينه الخيل نرحل وين

يبن امي المصايب راح توليني
اخذ روحي يبو السجاد اخذ عيني
****3***************
فوك التل اصيحن خوية تسمعني
وانت اعله الترب مطروح تفجعني
خوية السيف كبلك خل يكطعني

كبل حسين اريد الموت يلفيني
اخذ روحي يبو السجاد اخذ عيني
*4*************
الشمريصعد على صدرك يبواليمة
يلجم صدرك المصيوب ومدمه
يحز راسك يبو السجاد عن جسمه

وسوط الشمر يالمذبوح يسبيني
اخذ روحي يبو السجاد اخذ عيني
****5**************
راسك عالرمح مثل الشمس مرفوع
وعلينة الخيل هجمت والتامة تلوع
تشب نار بخيمنه والكلب مصدوع

ولاحامي العكب عباس يحميني
اخذروحي يبو السجاد اخذعيني

&&&&&&&&تمت بعون الله
حيدر موسى الرميثي

#قصائد_الامام الحسين ع

بسمه تعالى
***
يخويه بحياتك تودع بناتك
تظل عد رقيه صور ذكرياتك
يروح الزكيه تشوفك رميه
______
أروح ميسره ياخويه والأيتام بعد عينك عليه تكثر الألام
وجرح بنتك رقيه ما اظن يلتام عله فراكك تموت وتندفن بلشام
ولا يهده ونهه تموت بحزنهه
واخبرك يغالي بديه دفنهه
العزيزه رقيه
______
شلون أحجي واسولف هضم لبدنياي وحس نار الخيم مشتعله وسط أحشاي
تكطع كلبي كل طفله تريد الماي تلوذ من السياط وتحتمي بحماي
شسوي لزماني بسهامه ولاني
بعد حامي خدري الشمر خويه جاني
يريت المنيه
______
يبو السجاد كلبي مجمع الأحزان من يوم السقيفه وذيجه النيران
وبعد أكثر باجر تنذبح عطشان أسئلنك وريدنه الجواب الأن
لأجاك ويطبرك وسحك خويه صدرك
تشوفه رقيه يحز بيده نحرك
شيصبرهه أليه
_____
ليل العاشر هوايه يألمني وريدن من أون يحسين تسمعني
باجر خويه ياهو اليصبرني وبتك من تجي وعليك تسئلني
وحك الصميده أبويه أريده
جوابي شكلهه تكطع وريده
ولا منه جيه
____
باجر خويه باجر أعرف أخباره من توكع علينه تهجم الغاره
ولا عباس جفه يلوح بتاره ورقيه تصد عليه وتبقه محتاره
مصابك فجعهه وعدوك دفعهه
ضربهه بسياطه وشكالك دمعهه
تنادي يبويه
____
بلايه روح أروح وكف اعله التل بيا صوب انته طايح خويه ما أندل
وياهوه الأسئله ولو ردت أسأل بس عدوان وادري أنته ما تقبل
الهزل حضروهه اليتامه أضربوهه
وبنات الرساله يخويه سبوهه
وتراني سبيه
___
الشاعر " علي الحجامي "

#قصائد_الامام الحسين ع

لا تطبره ابسيـفك عـوف نحـره
ولا ترضه بخيلك عوف صدره
زينب اتنادي بدمعها عوف الحسين
&&
عوفه لحضه ايتام عـنده ومحـد الهـم
اتأمل اعله حسيـن راسه بــيه املهـم
لا خيم ظلت علينه او لا كـفـلهـم
بعـده كل اطـفـاله عـندي ايحـل اجلهم
عندي اطفال اتـريــد والــي للخيـم
عندي اطفال تصيح ويــنـك ياشهم
زينب اتنوح وتنادي يا ام البنين
&&
12 ليش اضربه خله بلكي بيه روح
خـلـه للدفان جسمه اوبــس الجـروح
يكــدر ايغسله اويـدفـنه بدمعه وبنوح
حيـره لو مايلكه راسه وهـوه مذبوح
يااللهي مـــن توسدله الشمـر
يااللهي طـبــرو احسين ابقدر
ونت بدمعت رقيه مات الحسين
&&
صعـبه اكــول حسين خـويه الله وياك
خاف يسمعـني العليل اوروحـه بـرجاك
ايموت لو كله ابمصيبه وعملت اعداك
مو سهل راسك يا خويه وسيلة ادماك
اه يا ويلي صعبه عملت كربله
اه يا ويلي ياهـو بعدي ايغسله
صبري يازينب يخويه الخاطر الدين
&&
جسمه كله اجروح خله الخاطر امته
يانــذل عــوف الحسـين اشوفه بنـته
لليـتامه اوللعـليل وغـربـت اخــته
ياوكـــت زيـنب سبــيه اوتـذبـح انـته
ضلت اتنوح من طبر راس الولي
ضلت اتنوح باليـتـامه يـاعـلي
اتنوح زينب والحرم دم تهمل العين
&&
خادم خدام اهل البيت الشاعر الحسيني جاسم حميد الاسدي
0770317420---------2018

نزلة ..... في ليلة الوداع ليلة العاشر من محرم


ليلة وداع ودمع. والمصايب تنجمع
گلبي هايم منفجع. بوداع اخوتي
...............

أشد كل ليلة هاي بكل حياتي
گبل باجر ردت ساعة مماتي
اخوتي تروح تگرب نايباتي
ابقه بلا خدر خدري بعباتي
ريته لا طال العمر. ولا صبح باچر يطر
گلبي يتلاهب جمر. بوداع اخوتي
...................

أودع حسين ما ينطيني گلبي
يربي شلون صبّرني يربي
اظل بنار حزني ونار عتبي
حبيبي حسين اخويه ونور دربي
باجر يذبحه الشمر. ينهشم منّه الصدر
ريت لا طر الفجر. بوداع اخوتي
....................

ابو الاكبر اودعه شلون بيّه
اريد وياه اظل وهاي هيّه
امشّي عليك حيدر والزچيّه
يليل العاشر اطّوّل عليه
شوفت حسين الضوه. من زغر عشنه سوه
بصدري مخنوگ الهوى. بوداع اخوتي
..................

اروحن للكفلني وصان خدري
وگلّه شلون ياعباس بامري
آنه ام الخدر عباس تدري
ترضه سياط شمر تلوح ظهري
باجر يطيحن سوه. چفوفك ادينك واللوه
گلبي هالليله نچوه. بوداع اخوتي
....................

من يطفي الخيم من تستعر نار
من يجمع يتامه تصير طشّار
گلبي شلون من هالساعه محتار
تدري بآل اميّه ارجاس وشرار
باجر يمسنه الهضم تنسلب كل الحرم
حيلي هالليله انهدم. بوداع اخوتي

سيد زيد الفحام
______________

قصيدة في ليلة الوداع ليلة العاشر من محرم


يا ليلة الوداع. رحمينـي وتـمـهّـلي
يا ليلة الوداع. محتاجه اودع هلي
.......................

آنه زينب والسبي قرّب عليّه
هذه آخر ليله وي اهل الحميه
باجر يذبحون اخوتي عله الوطيّه
باجر يسموني مو زينب سبيّه
اتحسّس الضياع. من يبقه باجر الي
يا ليــلة الـــوداع. محتاجه اودع هلي
.....................

آنه ويّه حسين عمري كلّه جبته
هوه اخويه وتاج راسي وانه اخته
شلون لو باچر عله التربان شفته
بلايه راس وتسحگ الخيل عله جثّته
بعيوني انطباع وجه الحسين الولي
يا ليلة الــوداع. محتاجه اودع هلي
......................

رحمي يا ليلة العاشر رحمي حالي
مو فقط ليلة ردت منّچ ليالي
حته أشبع شوف من اغله الغوالي
حسين أبو السجاد هذا وقدره عالي
عن آخر جتماع هالقصّه ياسائلي
يا ليلة الــوداع. محتاجه اودع هلي
...................

بعد عندي اوداع وي بدر العشيره
كافلي العباس ما يكفلني غيره
عالنهر باجر يطيح شلون حيره
من اميره بجاله اتحوّل اسيره
لو غدروا الشجاع. اعني الگمر كافلي
يا ليلة الــــــوداع. محتاجه اودع هلي
...................

بالله يا ليلة العاشر لا ترحلين
ما اريد افگد يليله اغله الاثنين
ما بقوا وياي بس عباس وحسين
وين انطي الوجه بغياب اخوتي وين
مو كافي افتجاع. گلبي بحزن مبتلي
يا ليلة الــــــوداع. محتاجه أودع هلي

سيد زيد الفحام
__________________________

#قصائد_الامام الحسين ع


على التل الزينبي - ويه زينب نوكف احنه نصيح عباس
على التل الزينبي - نصيح ياعـــــــــباس وينك حزو الراس

حركو اعليهه المخيم يابو فاضل بيهه تعلم
...........................1

بينك وبين المخيم تل مصايب لو تراقب طاح الحسين
طاح عطشان وينادي ماتجينه الماي وينه وتسكي كلبين
وكلب يمن من يشوفك كلب ظامي وكلب دامي وكلب نصين

على التل الزينبي شلون تكدر تنظرلنه وسهم بالعين
على التل الزينبي شمس وكفت هاي زينب تندب حسين

على شمسك ليل خيم يابوفاضل بيهه تعلم
..............2
جبل فوك التل عجيبه نور زينب يضوي كوكب شمعة احساس
ماتطفيهه النوايب اسم زينب علم يكتب (بين الاقواس)
راية العباس زينب معنى اسمهه اليفتهمهه فقط عباس

على التل الزينبي بعين كلبه المهدي ينظر صاح جداه
على التل الزينبي من محاجر عينه خضب خده بدماه

دمعه تحجي ودمعه تنظم يابوفاضل بيهه تعلم
....................3
ليش زينب يابو فاضل عافت التل ليش نسأل ركضت بخوف
ترفع بكل خطوه رايه خطوه لوعه وخطوه دمعه تسكي الطفوف
فوك جسم حسين طاحت مثل جفك زينب اختك طاحت انشوف


على التل الزينبي جود جنه التل تبده وزينب الماي
على التل الزينبي ركض يم حسين سالت تعلم بهاي

كلب زينب من تألم يابوفاضل بيهه تعلم
....................4
عليك ظهر حسين محني شكبر كسره ومن يجبره يابو فاضل
انكسر ظهر الحره زينب لبو اليمه من تشمه ودمه سايل
اتلمست جرح المثلث صاحت افزع خويه ارجع لاتطاول

على التل الزينبي بين نار خيام تلهب بين الحسين
على التل الزينبي بلصفا وللمروه اسعه بين جفين

تقبل الجف التوسم يابوفاضل بيهه تعلم
.......................5
على صدر حسين صاعد شمر لازم سيفه عازم يكطع الراس
للنهر متوجهه زينب تكول وينك فكهه عينك خويه عباس
خويه يلجم جرح صدره ويحز نحره بعيني انظره ونار الانفاس

على التل الزينبي تنتظر زينب يكافل منك جواب
على التل الزينبي تشيل عبدالله سكينه وجرحه ماطاب

دمع سكنه اعليك من دم يابوفاضل بيهه تعلم
..................
حيدر موسى الرميثي

-دفن الاجساد الزاكيات...جديد ٢٠١٩
___________________
ايجمعه راد و ما كَدر..جسمه متكَطع وذر
ناده جيبولي الحصيرة
حيرة السجاد حيرة
و الله حيرة. و الله حيرة
____________________
من وصل جسم الغريب ..شافه مطروح و سليب
و التراب اكفان صاير
يرتفع منه النحيب..شلونه حالك يالحبيب
بشيلِته السجاد حاير
ناده جيبولي الحصير..حزنه بالخاطر جبير
عاين بناظر حسير..و الكَلب ضامي و كسير
يجمع اوصال الجسد
جمرة ساعر ما خمد
نزّل حسين بحفيرة...1
___________________
قبّل النحر القطيع..بعده يتنازف نَجيع
و النحر حسرات نازف
اتكلّم بصوته الرَفيع..عالصدر خلّي الرضيع
من الظلام ايكون خايف
همسة من نحر الحُسين..بيهه يتهادَه الحَنين
حسرة الام و أنين..نزفه من كَطع الوَتين
عالجسم هال الترُب
و الدمع من دم يصُب
روحه جن صارت أسيرة....2
___________________
من بعد دفن الأمام..يدفن اصحابه الكرام
بس حبيب بحفرة وحده
بعينه مشدوه الكلام..ردّد اعليهم سلام
بالجمر مشبوب جبده
وسّد اصحابه الأُباة..لاجله عافوهه الحياة
فرحوا بهذا الممات..كلهم اِقدام و ثبات
كلهم ايثار او وفه
كَالوا الدنيه العَفَه
وافَوا ال حيدر غَديره....3
___________________
اتوجّه ال شاطي المُصاب..شايل اهموم و عتاب
و الدمع من عينه سايل
دمعة الام انتحاب..عمّه نايم عالتراب
من سرَت عنّه المَحامل
ما تريد اسكينه ماي..عاود الزينب مَعاي
و استمع لوعة بجاي..ظلمة من بعدك سِماي
اعيوني فاركَهه الضوه
و ريتي جافاهه الهوه
من بعد بدر العَشيرة....4
___________________
عاوَد بوكت الغروب..و زينب اتباري الدروب
و الحزن لفراكَه زايد
تنتظر جيته و تلوب..و الكَلب ناعي و يذوب
اتأخرِت كَامت تناشد
كَلهه بالدمعة العليل..ادفنْت اخوتج و الكفيل
نادت بمدمع يسيل..خويه ما ظل عندي حيل
ضامي مدفون بلحِد
ارقية تنتظرك ترد
يا ورد راحل عَبيره....5
=_=__=_=_=_=_=_=_=_=_=_=_=_=
سيد حيدر العوادي
بابل الشوملي

#شور _للدفن


عالثره عفته طريح حسيني
وانه بدروب اليسر سابيني

ماحضرت بدفنته
بهيده اشيلن جثته

يمه حضري دفنته وعذريني
عاثره عفته طريح حسيني
⇅⇅…✫…………………………✬✭✫

غصب يم الحسن عنه رايحه
والمدامع فوك متني سايحه
عالهزل يمه نصبت الفاتحه
يمه ماضن ماسمعتي النايحه

سكنه يمه تعدد النه
والربابه تجر ونه
يمه آتمنه تجي وتشوفيني
عالثره مطروح عفت حسيني

⇅…✫…………………………✬✭✫
يمه حضري يم ذبيح الغاضريه

عذري زينب المشت عنه سبيه
يمه لحسينج جيبيله ميه
رشي بيها الكبر يمه يالزجيه

يصعب عليج الوضع
انتي مكسورت ضلع

الله يعينج يا ضي عيني
عالثره مطروح عفت حسيني

⇅…✫…………………………✬✭✫

يمه لوخلصتي من دفن الضحايه
ديري عينج صوب المسنايه

هناك طايح يمه راعي الرايه
دوري الجفين يمه بالبدايه

ركبيهن عالزنود
جفوفه ليثاره شهود

جفوف ابو الغيره بعد جفيني
عالثره عفته طريح حسيني

⇅…✫…………………………✬✭✫

يمه ابو الغيره وافه بدينه
دون خدر اخته فده جفينه
وسفه حال القدر بيني وبينه
والكفلني السهم طفه عينه

خلافه يايمه نوليت
لليسر غصبن مشيت

رحت ولدربه تربي عيني
عالثره عفته طريح حسيني