tgoop.com/mllemustafa/9526
Last Update:
قصيدة (( درب السبي ))
راسه فوگ الرمح بس يعرگ جبينه
من علــى زينــب تصــد عباس عينه
هيچ الگمر ... منهه إعتذر
..................................................................................................................................
ملتزم عهد الكــفــالـــه حتى بدروب السبي
راسه حار وبعده حارس عينه ظلت عالعبي
كلّه غيره لسان حاله يگول يا خيتي إطْلبي
والنعم منك تگــلّـه وإنــتـه ذخري ومعصبي
أدري مو هيّن عليك أمشي سبيّه
لكــن وراســك بــعـدني الهاشميّه
بهذا القدر ... منهه إعتذر
..................................................................................................................................
آخر إوداع بمـحــرم من بــعـد گــطــع الچفوف
هوّه مرمي عالشريعه وهيّــه فوگ التل تشوف
راسه بي غيره ولحگهه عالرمح بصعب ظروف
گمر ما يــتــرك سماهـــــه وما يهمه كل خسوف
هذا طبع الهاشمي وهذي صفاته
غيرته عــدله تـظل حـتـى بمماته
بأصعب سفر ... منهه إعتذر
..................................................................................................................................
رمح شـايـل راس كافــل بهالمسـافه شگد تعب
گطره مــن غُرّة جـبـيــنه غيّــرت لون الخشب
عين عـبـــاس الرقـيّـه شـاهــدت وهنــا غضب
چنّه يدري إعـــداه باگــت مــنـهه ترچيةْ ذهب
ينظر الزينب لـچــن يبــدي حياءه
هذا موقف يكفي عن قصة وفاءه
أروع صور ... منهه إعتذر
..................................................................................................................................
ينظر الضـعــن السـبــايـا ومـدمـعــه من دم يهِلْ
شاف بچفوف العـقــيـلـه جـــروح من حز الحبل
كلفه من تشوف عـيــنــه هيچي موقف مو سهل
حسره بس كــلــش ثـگـيــله ومن يلم ذاك الشمل
مو عجيبه أمن الرمح دخان يطلع
هذا أبو فاضـــل بعــد ويريد يفزع
بطبعه الأغر ... منهه إعتذر
..................................................................................................................................
طالِــع يـباصــر الحــرّه ومــا يـظـل بــكــربـلــه
شــهــم مــن زيـنــب تـگـلّــه يا كـفــيــل العايله
هاي محنه وراح تگــظــي وتـنـتــهـي هالمرحله
خويه كل تقصير مــنّــك مــاكـــو يـــا بدر الفلا
إنته عباس وتظل عباس غالي
يا ضواي وعازتي بهاي الليالي
حيل إنقهر ... منهه إعتذر
..................................................................................................................................
راسه ويّ كل الضعـيــنــه إيناطـر ويزرع أمان
مو فـقـط بــدر العـشــيـره بــل بـــدر كل الزمان
غيرته اعله الأهل تـبـقــه بـكــل زمان وكل مكان
رايه فوگ الرمـــح راســه تــرتـفــع وكــت الأذان
حاشه يترك زينب بهاي المصيبه
والـثـلـث تـنعام بالطــاهــر حليبه
واعله الأثر ... منهه إعتذر
..................................................................................................................................
يـعــرگ وينـضـح جبـيـنه غيــره وإمـروه الكـفيل
بهالليالي الكـمــر يحــرس ضـعــن زينب والعليل
واليضيع من الـيــتــامــه يـلـگــــه أبو فاضل دليل
رغم كل الصـــار بالطــف بــيــوم عــاشـر مو قليل
عهد عنده إويا العقيله وحفظ عهده
بعده أبو فاضـــــل كفيل الهسّه بعده
اوياها سهر ... منهه إعتذر
..................................................................................................................................
خادم الإمام الحسين عليه السلام
عمار هليل الواسطي
BY الحان الرادود مصطفى الكربلائي
Share with your friend now:
tgoop.com/mllemustafa/9526