tgoop.com/mllemustafa/9102
Last Update:
حسين منك خاف اتيهن حيل جلب بيدي
انت گايل للخدمني يصير مثل وليدي
وين اروحن لو عفتني
وع مجالس علمتني
لا تهدني لا تهدني
...........
علمتني اعله المجالس والبواجي واللطم
مدلل وياك انه عايش بس تهدني اشبع هضم
الله لا يحرمني منك خلني من كلشي انحرم
كلبي كل ذنوب اترسه ومن اجيلك ينعصم
انت جنه بلا مقابل
انت والد وانه جاهل
لاتهدني لا تهدني
...........
شلون غرگان ويدور ع الجرف نسمة هوه
هيج حالي بلا مجالس انه واليغرك سوه
عيوني لو مابيهه دمعك عميه تبقه بلاضوه
حسين انت اول طبيب ايداوي عله بلا دوه
اليلطم ويبجي بنحيب
بمجلسك رأسآ يطيب
لا تهدني لا تهدني
.........
شيخ من اكعد واسولف بيك عنواني انعرف
انه اول خادم اكعد بالصدر مو بالطرف
شما اذل روحي بخدمتك انترس رفعه وشرف
دمعتك تغسل ذنوبي بمجلسك كلبي نضف
ياهو غيرك يسوه دمعي
تنومست بيك ويه ربعي
لاتهدني لا تهدني
........
حسين سهلهن علينه العَشره والمشايه
تسوه عندي الدنيا كلهه من اسمع الملايه
لذت سنيني بحياتي اعليك اسوي اقرايه
كلشي ماريد ارد اجيلك حافي شايل رايه
واطب تعبان الضريحك
حتى تحضرني من اصيحك
لا تهدني لا تهدني
.......
حسين يردوني اعوفك كطعو اعليه الدرب
لذة العاشك حبيبه يصير لليعشك صعب
مادرو بيك انت كاعد منتجي بنص الكلب
ايردن سنيني وشبابي بنص ضريحك من اطب
شنهي هذا الحب عجيبه
وانه اعرفك بس مصيبه
لا تهدني لا تهدني
..........
الخادم موسى البطلي
BY الحان الرادود مصطفى الكربلائي
Share with your friend now:
tgoop.com/mllemustafa/9102