tgoop.com/mllemustafa/9071
Last Update:
لَجِل دين الله وكتابه
والنبوّه الخَاتمه
إبو اليمّه حسين ثار
وسَوّه بالطف ملحمَه
حُسين .. حُسين
*
لَجل لا ينمِحي مَعنى الدين ويظل بس اسِم
وحتّه إسمَه ابيوم يصبَح ماضي ويرِد الصَنم
صَاح ابو السجاد لا للجُور والذِل والظلم
واعلَن الثوره ابصَلابه وخَاض بَحر امن الدِمه
لَجِل دين الله وكتابه والنبوّه الخَاتمه
*
حسين شَاف الدين ينزِف وابن هِند اليذبَحَه
وبالفسُوق وبالرَذايـل جِهـَر والكِل يمدَحـَـه
ولجل هذا ﮔال ارفضَه وأﮔِص إيد اتصَافِحه
وبرَفض الحسين فـَـزّت أمّه ﭼانت نايـِمَه
لَجِل دين الله وكتابه والنبوّه الخَاتمه
*
الگوم ذيچ الحاربتـَّه النبي بأوّل دَعـوِته
حاربَت الحسين بالطـف وبسِيوف اتلـﮔـّـته
ايزيد ابوسفيان جدّه وأخَذ سَالِف سِيرِته
السَبب واحِد والعَدَاوه اجيال ظلّت قائمَه
لَجِل دين الله وكتابه والنبوّه الخَاتمه
*
حسين ﮔال ابعَالي صوته وبنَزِف نَحره كِتب
العقـيده العِدنه ثوره ومو هِـتَافات وخُطَب
ويالتِريد الجنـّه توصَل لازم اتدُوس اللهـَب
وكل هَدَف ﮔِدّامه حَاجِز خوف لازم تهدِمَـه
لَجِل دين الله وكتابه والنبوّه الخَاتمه
***
صَرخة ابن الحِيد فِكره ودَوّت ابطُول الدهر
السَعاده الموت عندي ابعـِزّه واصرار وفـَخَر
والحيَاة اويَـه الطغاة ابذِلّه مِن مُوتي أمَر
عاشت الصَرخه الشريفه وعشِت يابِن فَاطمه
لَجِل دين الله وكتابه والنبوّه الخَاتمه
---------------
لقمان لعيبي البدران
1442
@lukmanalbadran
BY الحان الرادود مصطفى الكربلائي
Share with your friend now:
tgoop.com/mllemustafa/9071