tgoop.com/mllemustafa/6298
Last Update:
مسلم
..
مسلم للسفاره
والغيره شعاره
صاح بصوت وين الموت وينه
وافه الدَين حب احسين دينه
...
بدنيه من الوفه راح
شايل راية اصلاح
والثوره الحسينيه بداها
باس اچفوف الحسين
وحط مكتوبه بالعين
لاح بمهره والكوفه اعتناها
طب اعليهم وگال
جايب بيدي مرسال
وسمعوها الرساله من قراها
صاحت كلها لبيك
يا مسلم هله بيك
الكوفه كوفتك وانت فتاها
عالفطره شكرهم
ما يدري بغدرهم
بذل هيهات لا متبات عينه
وافه الدين حب حسين دينه
...
ناده الناس يا ناس
حب حسين مقياس
والطاهر حليبه خل يبايع
اهل المعرفه اتگول
تروح الدنيه وتزول
عيفو آهل المصالح والمطامع
هنه الدنيه والدين
كلهن عند الحسين
كلامي مو خيال وهذا واقع
من غير ابو السجاد
دنيانه متنراد
وبس العاقل الخطه يتابع
مسلم عبد صالح
وايقدّم نصائح
صاح الجود كله يعود لينه
وافه الدَين حب احسين دينه
...
وبليله وضحاها
ما يدري شجاها
الكوفه رادت اتطفي شِموعه
لمّن صار الغروب
وحده ابين الدروب
واعليهِ الدهر حشّد جموعه
بديرة غربه حاير
وايدوّر مناصر
عطشان ويدگ اباب طوعه
فهمت من كلامه
من بيت الامامه
بيت الماعرف ذله وخضوعه
طوعه موقف الها
يسوه الزلم كلها
هذا الصار خله النار بينه
وافه الدَين حب احسين دينه
...
فجر الموت من لاح
لن يسمع صده اصياح
فز مثل الاسد واعليها غاضِب
جعل مصباحهم ليل
دار الخيل عالخيل
ولمملمها الكتايب عالكتايب
دگهم راس بالراس
واگف چنه عباس
ناده يا علي وظهرت عجايب
كل ذيج السرايه
راواها المنايه
غيمه ويمطر اعليها مصايب
يهتف صوته كل حين
عمري فدوه لحسين
ما خلاّه وفّه وياه دَينه
وافه الدَين حب احسين دينه
...
ثلث تالاف سياف
وحده وهمَّ آلاف
حان آمر القدر ماعنده چاره
ويلاه والف وآه
خانت بيهْ دنياه
رموهْ بنبل وبنار وحجاره
امان آنطو وخانوه
بسيف الغدر ذبحوه
وذبّو جسمه من قصر الاماره
ولوعه التهدم الحيل
جرو جسمه بالخيل
ودمع حسين لمصابه تجاره
من گطعو وريده
بي حسّت حميده
اتعزيها اتواسيها اسكينه
وافه الدَين حب احسين دينه
...
خادم الحسين ( عليه السلام)
كرار حسين الكربلائي
( ابو كميل )
BY الحان الرادود مصطفى الكربلائي
Share with your friend now:
tgoop.com/mllemustafa/6298