tgoop.com/mllemustafa/6170
Last Update:
بحبال اعداك مجتفيني ،،يامذبوح
وسفه وذباحك يسبيني ،يامذبوح
جنت اميره ،صرت اسيره ،والله حيره
يامذبوح
،،،،،،،،،،،،،1،،،،،،،،،،،،،،
يدكون السبينه طبول من طبينه للكوفه
وعليه اتاشر الشمات زينب هاي مجتوفه
كلهه اتريد تشتمني وابوي انكر معروفه
يحط عينه عليه الجان خيالي يحلم ايشوفه
بحجار الكوفه تلكتني ، واتاذيت
جم حرمه المنهم جرتني ، واتاذيت
من دلالي ،الهذه حالي ،رد يغالي
يامذبوح
،،،،،،،،،،،،،،،2،،،،،،،،،،،،،،،،،
احس بجف اديه يموت من كد مايجرونه
خويه البلخرابه يبات شيغمضهن اعيونه
يمشونه علئ درب الشوك جيه حفاي يدرونه
وذا يوكع طفل منه بحوافرهم يسحكونه
واليعطش لاماينطونه ، خويه الماي
يم شفته ابحسره يبدونه ، خويه الماي
عطشونه ،وعذبونه ،ردنه عونه
يامذبوح
،،،،،،،،،،،،،،،،،3،،،،،،،،،،،،،،،،،،
جسمك مورمح يحسين يرجع جسمك اتمنه
بس الخيل يبن امي وي الكاع ساونه
يعاين علحبل كلساع راسك خويه احسنه
هواي الراس بيه اتراب خل ينزل امسحنه
حر الدنيه مغير لونك ، أي ياراس
وشيب الفركه مغطي اعيونك، ،أي ياراس
خوله اديهه ،،مجتفيهه ،رد عليهه
يامذبوح
،،،،،،،،،،،،،،،،،،،،،4،،،،،،،،،،،،،،،،،،،،،
كل ساعه اللعين يصيح وخري من الرمح عينج
ويشتم يضل ويصيح لااذبحج وره حسينج
ابقي اتنخي بلعباس يكلي وضلي بونينج
ماعنده الكفيل اجفوف كومي انطيه جفينج
يتشمت ياخويه بحالي ، ،بين الناس
ويعيرني بجف كفالي ، بين الناس
خدري مسبي ،وعيني تربي ،رد يكلبي
يامذبوح
،،،،،،،،،،،،،،،،،،،5،،،،،،،،،،،،،،،،،،،،
وين اندار اشوف الروس برماح ويصب دمهه
وادموعي علئ ظهر النوك سوت خويه مائتمهه
رقيه علئ التراب تبات من يوم الغبت عنهه
البحضانك يخويه تنام هسه الحبل حاضنهه
الماترضه الهوه يمر بيهه ، مرهه الضيم
صار الجلاد يبجيهه ، مرهه الضيم
يلووعهه ،يشتموهه ،وانت ابوهه
يامذبوح
،،،،،،،،،،،،،،،،،،،،،،،،،،،،،،
الشاعر بشار السامي
BY الحان الرادود مصطفى الكربلائي
Share with your friend now:
tgoop.com/mllemustafa/6170