tgoop.com/mllemustafa/6132
Last Update:
بيش اعاتبكم يخوتي // واني احس اقترب موتي
مـدري اطـلـع ياسهم // مدري احامي عالـخـيــم
بيش اعاتبكم يخوتي
//////////////////////////////////////////
اليوم عفتوني بوضع مـرمـر حـياتي
شرد اسولف عالجرى الكرب مماتي
مــرة اباوع عالنهر مــرة الـخـواتـي
مرة امسح بالـنحـر دمـة ابـعـبـاتـــي
وانة مهضومة بغدر // جبدي مطبوخ بجمر
مدري ادور عالعلم // مدري احامي عالـخـيــم
بيش اعاتبكم يخوتي
//////////////////////////////////////////
خوية طبيت بوضع اذكر دلالي
كمت ما اعرف يميني من شمالي
صحت عباس الشهم مدري اشجرالي
هاي ماجانت ابد توصل خيالي
اوكف اكبال الشمر // وانة ماعندي عذر
مدري اصدن هالجيّم // مدري احامي عالـخـيــم
بيش اعاتبكم يخوتي
//////////////////////////////////////////
جمرة احزاني سلتني ابهل قضية
كمت الوعن ياعلي كبل الـمـنـيـة
اطفال تصرخ يالحسن هاي المسية
بيش اودعكم يـخـوتي ابيا رزية
منين اجيبك ياصبر // حسين مذبوح الظهر
بيتي هاليوم انهجم // مدري احامي عالـخـيــم
بيش اعاتبكم يخوتي
//////////////////////////////////////////
ثمرة ادمومك يخوية المهدي يجنيها
باجر ايطلع الرضيع القصة يرويها
ايصيح ياعالم تعالوا اشلون اداويها
جروح عباس الشفية شلون اجازيها
والسهم نابت بعد // جفن عينة ونمرد
حتة راسة ماسلم // مدري احامي عالـخـيــم
بيش اعاتبكم يخوتي
//////////////////////////////////////////
سامحوني اليوم خوية دموعي تجري
عـكب عزكم والدلال وضاع صبري
مدري الم اطفال تاهت مدري خدري
مدري اصيحن ياحسين وشنهو عذري
لو نشد باجر علي // وين خليتي الولي
خلافة ضلينة ابعدم // مدري احامي عالـخـيــم
بيش اعاتبكم يخوتي
//////////////////////////////////////////
من دمع سجاد معروفة الحقيقة
باجرالمهدي يجي ويعلن طريقة
يخلي دمعاتج رقية ابكل شهيقة
وراية العباس تبقى انة عريقة
راية شايلها ابأمل // سيدي انريد العجل
يمتة ويخط القلم // مدري احامي عالـخـيــم
بيش اعاتبكم يخوتي
//////////////////////////////////////////
الخادم ابو علاء العزاوي
BY الحان الرادود مصطفى الكربلائي
Share with your friend now:
tgoop.com/mllemustafa/6132