tgoop.com/mllemustafa/5943
Last Update:
#قصائد_محرم_1441
لسان حال العليله ع
وحشه بيتك والهجر ماذيني
انه بنتك والهوى تسميني
يمته ترويني يماي ...... طولت بالفركه هاي
انه بنتك والهوى تسميني
***********************
صعبه دارك خاليه ... والمسافه هوايه
يمته ترجع والكلب يهجع عويله
يبو الاكبر وينك ...... عيني فدوه لعينك
بعد عينك بويه ما تبقالي حيله
انه يمك صاحيه ...... وبيه كل العافيه
لكن بفركاك انه اتسمه العليله
منك اخذ قوتي ..... يابعد كل صوتي
كلبي محزن من صبح مبعد خليله
كلبي ما ظلاله حيل ..... يمته ترجعلي يهيل
شلون اصدك انت المجافيني
انه بنتك والهوى تسميني
***********************
جفني بعدك حافي ...... وادري بي ما غافي
ارموش عيني بفركتك ثق طايحه
وبمضيفك وادم ...... يا فريضة هاشم
مجمر ادلالك خفت ما صايحه
تبجي عتبة دارك ...... تنشد اعله اخبارك
شلون باجر انت مالك فاتحه
من بستني براسي ....... احترك بيه احساسي
حضري روحج كال عندج نايحه
عيني مشبوحه بكفاك ....... واكفه وتركض وراك
صعبه وحدي بدارك مخليني
انه بنتك والهوى تسميني
***********************
دورت عنك اثر ..... حتلو ريحة خبر
ما يطيح الساني هاي السالفه
هايمه بديرة غرب ....... وانه فاركتك غصب
ظهري محني من كثر ما واكفه
زغيره متوعده الك ....... افرش امصلايتك
فوك المصلايه بعدك طايفه
ما اعوفن عادتي ....... انت روحي ومهجتي
انه بنتك بويه كلش خايفه
خايفه لا ما تجي ....... بعدك المن ارتجي
الليل اظلم وانتظر تلفيني
انه بنتك والهوى تسميني
***********************
بويه بعيوني حجي ..... مطرز بحسره وبجي
والخلك بايد ترى وما عندي همه
قصتي تبجي النمل ..... شلونه عبدالله الطفل
نحره سالم رده الي مشتاكه اشمه
الوادم تمر بابك ...... تكله وين احبابك
بينه تتشمت ترى وما عدها رحمه
وانه اعرف عالي ..... وعد حبيبك غالي
الما يحبك كلي بالباري شيفهمه
تركع املاك السماء ...... الك في طف كربلاء
تيهت طيفك الك دليني
انه بنتك والهوى تسميني
***********************
انتظر منك يماي ....... باجر تكلي تعاي
بالحلم ثق يابه ما مندومه
انت يازين الورد...... بس اشمنك ورد
كلفه من عطرك اظل محرومه
بس اشوفن جيتك ..... دمعي انشفه بلحيتك
ضمني يم صدرك ترى مالومه
خيل ابناء المجوس ...... خلها بضلوعي تدوس
وداعتك ما كول ابد ملجومه
بيه يصبح عاشر ...... لو يجيسك حافر
افدي روحي لشوفتك تدريني
انه بنتك والهوى تسميني
***********************
السيد احمد الميالي
تم بحمد الله وتوفيقه
BY الحان الرادود مصطفى الكربلائي
Share with your friend now:
tgoop.com/mllemustafa/5943