tgoop.com/mllemustafa/4691
Last Update:
الليله مهموم كلبه ملجوم
تحجي عينه اويه الصور
اعله امه ماتنطيه خبر
يمه يمه يمه يمه
*****
عكب نورج يمه هسه البيت بالظلمه انترس
وبسجن هندس فركتج هيج واحدنه انحبس
صرنه بال يايمه نصرخ يله عود انجر نفس
والدمع شگگ وجنه وجفنه بالكصه انغرس
وين وين رحتي وعفتي الزغار
وين وين بدمعه وصوره تحتار
هاي العيون . بيها مدفون
ابابها اشكد انتظر
اعله امه ماتنطيه خبر
يمه يمه يمه يمه
***********
لو شفت شاب بمشيته يمشي ومحني الظهر
كول ماتت امه هذا وهيج اظن ظهره انكسر
ولحيته اشكد شيب بيها بكثر ما يحضن صور
واربعينيتها طالت والها كاصد ماصبر
نام نام يم گبور الاعزاز
نام نام گلها الحضنج اعتاز
واسمعه ينوح گلها مجروح
وعلگبر شفته نظر
ا عله امه ما تنطيه خبر
يمه يمه يمه يمه
**********
خطوته اتجر بدمعته وكلبه متگطع وصل
وتيه مچان العزيزه وعاين اهنانه اشحصل
بعالي صوته يصيح يمه هذا ابنج هل وصل
كومي انفضي اتراب گبرج اتطيب احضانج علل
صاح صاح گلبچ يحمل افراگ
صاح صاح وانه اوليدج اشتاگ
فتحي الباب وياج الي اعتاب
كافي مو كلبي انكسر
اعله امه ما تنطيه خبر
يمه يمه يمه يمه
**********
انكسرت امريتنه گلها نكشخ اعليمن بعد
العيد مايسوه بدونچ لا تكسرين بولد
اعليچ من ابچي دمعتي مامش اليمسحها احد
انتي ربعي وانتي امي وانتي مصباح السعد
ليل ليل ياگمرتي بنص ليل
ليل ليل يشتم عطرچ الهيل
بيه مدفون بعدچ اشلون
اسمعته واگليبي انعصر
اعله امه ماتنطيه خبر
يمه يمه يمه يمه
*********
من كضه بچيه ونحيبه ناشف بعينه بالدمع
گصد للحضره يصلي يدعي ليمت ننجمع
وگله احلفك بالزجيه ونحر ذاك المنگطع
لاتعوف امي وحيده بالگبر مامش ربع
هاي هاي تعشگ مجلس حسين
هاي هاي تطفي بالصواوين
بهاي الدموع تحضر الاشموع
لحنه القاسم دهر
اعله امه ماتنطيه خبر ******
زيد الزيدي
BY الحان الرادود مصطفى الكربلائي
Share with your friend now:
tgoop.com/mllemustafa/4691