tgoop.com/mllemustafa/3631
Last Update:
قصيدة نزلة .... في الخدمه الحسينية
من حزب قنبر خادم المنبر
...................
تكفيني
انت نور سنيني
خادمك يحسيني
بالعشگ مجنونك
احييني
بمجلسك خلّيني
لو ضعت دلّيني
ما اعيش بدونك
مطلوبي
نظرتك محبوبي
تمحي كل ذنوبي
نظره من عيونك
والله ما اخسر خادم المنبر
.............
دمعاتي
تشهد وحسراتي
يالسكنت بذاتي
خادمك سموني
ماعوفك
يالعشگت طيوفك
عايش بمعروفك
عاشگك يدروني
ما اهتم
بالعداوه تكلّم
احضر بكل مأتم
والله ميّمنعوني
بالعشگ اكبر. خادم المنبر
..............
ارويني
ياحٌسين اهديني
انت حبّي وديني
بمجلسك تربيتي
ايماني
حبّك بوجداني
ماكو غيرك ثاني
ياحُسين بنيِتي
يالغالي
يالمقامك عالي
بخدمتك للتالي
يالهواك بريتي
تابع لحيدر خادم المنبر
..............
نحييها
هالمجالس بيها
فاطمه انواسيها
والله ما ننساها
من تحضر
هيّه يم المنبر
للخَدَم تتشكّـر
تكتب الواساها
تشاركنه
فاطمة تسجّلنه
حاشه ما تتركنه
بالحشر بحماها
ينجه بالمحشر. خادم المنبر
.................
والقائم
بالمجالس عالم
ينظر لكل خادم
بيده يكتب اسمه
بآلامه
من يشدّ حزامه
يشارك اللّطامه
والملائك يمّه
مهدينه
يحضر يبارينه
والدموع بعينه
والعزاء يختمه
ينجه من يظهر. خادم المنبر
سيد زيد الفحام
____________________________
BY الحان الرادود مصطفى الكربلائي
Share with your friend now:
tgoop.com/mllemustafa/3631