tgoop.com/mllemustafa/17727
Last Update:
هــل هِلالك يــا محــرم بالحــــزن
والمدامع حگها تجري اعله الوجن
نار مستعـره وتشب
بوسط دلال المحب
والمدامع حگها تجري اعله الوجن
ـــــــــــــــــــــــــــــــــــــــــــــــــــــــــــــــــــــــــ
شهـر نترقــب اهلالــه ــ والحزن مالي المشاعر
بحسره وآلام ومواجع ــ وبگلب مكسور خاطر
شهر بيـه الدم تفايض ــ وجره من اطهر مناحر
ابكل حزن نستقبله
والمدامـــع هاملـــه
آه لوعــــت كربلـــه
تجرح وتدمي النواظر
والمجالـــس بالســـواد اموشحــه
نستمــع صــوت المصيبـه بنايحه
والخــدم متجمِّعه
بهالمصيبه املوَّعه
والمدامع حگها تجري اعله الوجن
ـــــــــــــــــــــــــــــــــــــــــــــــــــــــــــــــــــــــــ
شهــر نترقـــب اهلاله ــ بنظــره يمليهـــا دمعنــه
آه يحسيــن ومصابــه ــ من نشوف هلاله صحنه
وراية احزان ومواجع ــ فوگ كـــل منـزل رفعنه
گلوبنه وياهــا تـِــوِن
شهر مطلاعـــه حزن
جروحنه ما تستچن
خنجر ايحز ابجرحنه
ما مثل يومك يبو اليمــه حِصـَــل
فاجعـــه وعملتها اقــوام الجهـــل
هلال لَمَّــن ننظِره
نذكر الصار وجره
والمدامع حگها تجري اعله الوجن
ـــــــــــــــــــــــــــــــــــــــــــــــــــــــــــــــــــــــــ
شهر من يجبل علينه ــ تجري وحدها الدموع
يا چتيل العبره احنه ــ بين مهمــوم وجــزوع
تستعر نـار المصيبــه ــ بينه چن نــار الشموع
نـار لوعــة كربلـه
ونار نبلة حرملــه
ونار سبي العايله
يوم حاطوها الجموع
شبَّت النيران وحرگوهـــــا الخيـم
وعالهزل يحسين رچبوهــا الحرم
شمر حدّاي الضعــن
بعيد عن دار الوطن
والمدامع حگها تجري اعله الوجن
ـــــــــــــــــــــــــــــــــــــــــــــــــــــــــــــــــــــــــ
آه يهـــــلال النــــوايب ــ بشوفتك نهمل العَبره
وينصدع ركن الشريعه ــ يا گلب يمتلك صبــره
نذكـــر المظلــوم لَمَّـــن ــ گِطعـو الظلام نحــره
طاح دامي اعله الترب
والسهــم صــاب الگلب
دمومه من نحره تصب
وجالت الخيل اعله صدره
روس هاشـــم عالرمـــاح ودامِيَه
ودورهـــا ظلت حزينـــه وخاليـه
بس يتامه ملوَّعه
گلوبهــا متوَجِعــه
والمدامع حگها تجري اعله الوجن
ـــــــــــــــــــــــــــــــــــــــــــــــــــــــــــــــــــــــــ
شهـــر عاشــور وهِلاله ــ يعلـــن ايـــام المصيبه
وشيعة الكـــرار كلهــــا ــ نشوفهــا ثكله ونحيبه
على امصيبة ابو اليمه ــ ومهجة الهادي وحبيبه
حسين نرخصله الدمع
وللمصيبــــه نستمــــع
طـــاح عامــود الشرع
دامي والجثــــه سليبــــه
هـــذا شهــر الحزن هــــل اهلالــه
وانفجـــع هالكــون واختـل حالـه
راح مهجــة فاطمـــه
دم عليه تجري السمه
والمدامع حگها تجري اعله الوجن
كلمات عمار الراشدي
BY الحان الرادود مصطفى الكربلائي
Share with your friend now:
tgoop.com/mllemustafa/17727