tgoop.com/mllemustafa/15221
Last Update:
آه الخيل يُمّــــه الخيل
شو سون نهارك ليل
يالهزّك جنح جبريل
ياعطشان يايُمّه
ــــــــــــــــــــــــــــــــــــــ
مذبوح واجروح تارس حياتي
اتعنيت انعاك وافرش عباتي
يحسين چاوين راحن بناتي
ظليت اعاتب بالشمس .. ياشمس رحمي بحاله
كل ميّت اهله اتشيعه .. وميتنه محّد شاله
اتلمس ابصدرك واحن .. مارحـمته الخياله
دمك بالحوافر ذاك
ولا يمك اخت تنعاك
ياهــــو العالرمل خلاك
ياعطشان يايُمّه
ــــــــــــــــــــــــــــــــــــــ
اتدنيت حنيت اشتم وريـدك
انعه اعله الراس لو خنصر ايدك
امك الزهـــراء تعذرني اريدك
ماجيتك ابوكت الذبح .. يالجثتـك مرمـيه
يوليدي وابعيد الدرب .. وآنه الگوه مابيه
ايدي اعله خاصرتي تره .. وامشي عله العوچيه
حيلي امن الضلع مهدوم
اعذر وجهي الملطوم
ميته من هذاك اليوم
ياعطشان يايُمّه
ــــــــــــــــــــــــــــــــــــــ
عريان ذبلان خليني احضنك
تعبـان والخيل شمخليه منك
والماي غلطان من عطّش ابنك
شمسوي يايمه الطفل .. واتعنو ايذبحونه
عبد الله مومالت عطش .. كون ابورد يسگونه
ابعمر الفراشه وينذبح .. والموت سد اعيونه
جيبوله الرباب ابساع
خل تشيله من الگاع
محتاج العزيز اوداع
ياعطشان يايُمّه
ــــــــــــــــــــــــــــــــــــــ
كضيت مگفاك رمحك اجره
صلّيت لله ايســهّلي امره
والدم شلال ظل يجري حدره
محتاره اطلع ياسهم .. هنه السهام اهوايه
واچفوفي ترجف عالجسد .. تشبه رجيف الرايه
سجلني اني اول مره .. اتعنيت الك مشايه
وانه ادري المشه الگبرك
طيب جرح من صدرك
سبحـانه الرفع قدرك
ياعطشان يايُمّه
ــــــــــــــــــــــــــــــــــــــ
لن صوت من روح كـلش وجيعه
انداريت عالصوت بس ابفجيعه
لنهه ام عبـاس يـم الشريعه
اتعاتب بابنهه اعله النهر .. واتكله ياعباسي
قصرت لو ماقصرت .. وي السكن بانفاسي
ردتـك يَيمّه ابوگفتك .. بالحشر ترفع راسي
ومن شافتني محنيه
ركضت چلبت بيه
وگامت تقره لطميه
ياعطشان يايُمّه
ــــــــــــــــــــــــــــــــــــــ
واهناك عالـماي جينه وگعدنه
وادموع واعتـاب واقرايه عدنه
ومن يـوم رحتو نبچي بعدنه
طول الزمان ابمجلسك .. احضر واحن وانعه
والگه ابعزائك كل سنه .. كل الخدم مجتمعه
واليجري دمعه امسجله .. وانه الاجر ماضيّعه
وخدّامك يعرفوني
لو بس مره ينخوني
اكلهم هاكم اعيوني
ياعطشان يايُمّه
محمد الجماسي
#اللهم_عجل_لوليك_الفرج
BY الحان الرادود مصطفى الكربلائي
Share with your friend now:
tgoop.com/mllemustafa/15221