tgoop.com/mllemustafa/15215
Last Update:
كل صدرك اسهام وما تگدر اتنام
شگد ادري عطشان وعينك عالخيام
وكت الظهر راح الشمر يگطع وريدك
***
يحسين اشوفنك جرح والجرح هذا شكبره
واتخيلك فوك الرمل وخيول فوكك عشره
وسمعت كل كسرت ضلع وصدرك شفت بي حفره
ونحرك يبو اليمه الشمر اثنعش طبره ايطبره
من صدرك اتنوح وكل جسمك اجروح
شگد ادري تعبان يالضامي مذبوح
اتوسلك افرشني الك بلكت افيدك
***
يا ابو علي وحدك شفت والتمت الكوم عليك
هذا بسهم ذاك برمح وهذا بحجر ظل يرميك
وهذا يسلب اعمامتك ويرفس هذاك برجليك
وذاك اليسب ابفاطمه وهذا اليگلب بيديك
شو حاضن الگاع يالكلك اوجاع
من محبسك راح يعني اصبعك ضاع
اشگد صحت لمن طحت وين اصبع ايدك
***
الف وتسعمية جرح الطعنه فوك الطعنه
وما ادري منهن ياجرح الياذيك وتون منه
جرح الرمح جرح السهم لو للضلع هالونه
لو جرح زينب بالخيم وتصيح خويه الحگنه
ماتگدر اتگوم غارك بالدموم
ومن عندك حسين سلبوها الهدوم
واكبر جرح راس الرمح واصبح وعيدك
**
اشلون كلي اتحملت سهم الذي طر جبدك
كالو طلع من الظهر وكل حيل ما ظل عندك
عن الخيم ليش الشمر يحسين راد ايبعدك
وظل الرمل يا ابو علي كل ساعه يجوي بخدك
نايم بالشموس وسهام متروس
الخيل اعتنت ليك وبصدرك اتدوس
ظل ينسمع كسر الضلع الحافر يريدك
***
كلي شحمل ليك العطش بذيج الشمس والحر ذاك
مرمي عله وجهك عالترب وضاع الهوه عليك اهناك
خلوك عطشان وتون ومحد اجه اميه انطاك
ومحد اجه وعن الشمس جاباله وصله وغطاك
من الماي محروم ومتغيره الرسوم
بالشمس يحسين مايصلح النوم
عن السبي لو سولفت اجروح ازيدك
**
اشلونك لمن شفت الشمر ثاني ركبته بصدرك
وبيده لزمها لحيتك وبتده ايحز ابنحرك
بمنحرك حيرني الشمر يحسين ليش ايطبرك
كلي شحمل ليك الالم وساعتها الله يصبرك
حز نحرك وگام وتعنه الخيام
براس الرمح شال راسك للايتام
زينب تون وظلت تحن وعالتل تريدك
****
تمت
ميثم العمري
BY الحان الرادود مصطفى الكربلائي
Share with your friend now:
tgoop.com/mllemustafa/15215