tgoop.com/mllemustafa/15157
Last Update:
بحرگه ابچن يالعيون
هلي ما ظن يردون
واكتبيها رساله بعمر السنين
المرض ما يمنع اليبچي عله احسين
...
جدامي من راح الضعن طلعن بنات عيوني
عافوني اني ودمعتي والغربه باگت لوني
الخافو علي من كربله بچم كربله خلوني
بفراگهم مية ذبح مية سبي راووني
السبي مو الا عالنوگ
تره مثل السبي الشوگ
ومثل شوفي الدموع معاشره العين
المرض ما يمنع اليبچي عله احسين
...
گالو عليله والدمع ياذيچ من تبچينه
گلتلهم العنده بخت لحسين تهمل عينه
يا ناس خليت البچي مرسال بيني وبينه
يا مرض يمنع دمعته العطشان مات حسينه
بعلتي وعيني متنام
وأَنه ابچي اعله الخيام
وسط گلبي شلت جمرة صواوين
المرض ما يمنع اليبچي عله احسين
....
آنه بمحرم وبصفر ما فارگت دمعاتي
شهرين باعدني الوكت عن اخوتي وعماتي
ابعيده المسافه بس گلت جرح الحسين بذاتي
يوميه انصبله عزه وما بطلت آهاتي
لنحر الما شرب ماي
بچه حتى الهوه وياي
المصيبه أَكبر من سنيني مرتين
المرض ما يمنع اليبچي عله احسين
....
الغيم استحه من دمعتي من كثر ما بچيته
وحسين عندي اكبر جرح جرح المرض ناسيته
البمصيبته مبچي صخر شيگول گلب ابنيته
محرومه من گبر الابو لا زرته لا شميته
روحي لگبره تشتاگ
حنه ظهري بهالفراگ
البچاله واليزوره ايحصل اجرين
المرض ما يمنع اليبچي عله احسين
...
والدي ظل محني الظهر من فارگه عباسه
واگبال عينه اتذبحت صحبته واهله وناسه
شلي بعمر ما بي حزن وحسين گطعو راسه
صعبه اعيش بلا لطم والصدر حافر داسه
من گالولي مذبوح
گضه عمري بچي ونوح
بسبي زين العباد وعاش الونين
المرض ما يمنع اليبچي عله احسين
...
خادم الحسين ( عليه السلام)
كرار حسين الكربلائي
( ابو كميل)
BY الحان الرادود مصطفى الكربلائي
Share with your friend now:
tgoop.com/mllemustafa/15157