tgoop.com/mllemustafa/15068
Last Update:
شعندك ويه زينب ياشهر المناحر
شافت بيك اخوها يسحگنه الحوافر
لاتوصل بيك جروح
واهلالك اخذه وروح
ياشهر المناحر
....................
نظر زينب يامحرم عبر مرحلة الدمع
يهل شيب ودم سويه وصوته لوهل ينسمع
يامحرم موقليله والحصل ماينجرع
منهو شاف گبال عينه راس اخييه ينگطع
والخيل اعله صدره تهووس روحه رَده
كلها فوگ اخوها ولاواحد يبعده
لاتدنه الدم مسفوح
واهلالك اخذه وروح
ياشهر المناحر
....................
إنَّ يوم حسين گطّع گلب زينب ياشهر
حمره لسه چفوف اديها بيها دم امن النحر
الچان تغفه عينه يمها هسه صك عينه الحجر
كسرة الفخّار اخوها هالشكل صدره انكسر
ذبلانه شفافه وحتى السانه خشّب
يصرخ آنه عطشان وحگ جدي يزينب
ابعد ياشهر النوح
واهلالك اخذه وروح
ياشهر المناحر
....................
بيك ياشهر المناحر اعظم واكبر الم
بطيحة العباس چنها السمه طاحت عالخيم
تگله عينك بيها زينب ليش طفاها السهم
مطشر اعله النهر راسك والچفوف اعله العلم
كافل خدر اخيته ويدافع عليها
من تالي خذوها مچتوفات اديها
شوف الشامت مشبوح
واهلالك اخذه وروح
ياشهر المناحر
....................
فزّعَت زينب وفزعت نار ليها مضرمه
من عجاج الخيل صعدت فوگ تلها هايمه
تصرخ الحگ يامحمد ياعلي يافاطمه
بتكم الوادم ولوها والها ماظل ازلمه
زينبكم عزيزه ياهاشم عليكم
شوفوها شوضعها من تتنخه بيكم
ارحل ماظلت روح
واهلالك اخذه وروح
ياشهر المناحر
....................
ياشهر ليلة الحادي عشر باتت عالترب
تدور اعله العرف بيهم كلهم اعليها غرب
الفجر اجاها ودمع زينب نهر جاري من يصب
اليبدي يومه بچلمه حلوه وهيه تبدي بالضرب
بت حيدر خذوها عالهزّل سبيه
وحتى ايألموها يشتمون الزچيه
سافر عطرك ليفوح
واهلالك اخذه وروح
ياشهر المناحر
.................................
الشاعر
حسين حيدر الكربلائي
كربلاء المقدسة2022/7/13
BY الحان الرادود مصطفى الكربلائي
Share with your friend now:
tgoop.com/mllemustafa/15068