tgoop.com/mllemustafa/13722
Last Update:
عتاب – هجري
من وصلت للطفوف تعاتب راعي الچفوف
تصرخ گوم لينه يا حامي الضعينه
تعاتب راعي الچفوف
٭ ٭ ٭
خويه إجيتك شوف حالي و الله بچيت الصخر
نزلت عليّه المصايب چالسيـــول و چالمطــر
ما أضن تلحگ عليّه إختك بحــــال الخطـــر
جرعت الهموم الچبيره و الدمع يجري حَمَـر
إگعد شوف حالي يچفال الغوالي
كلهه تصيح وينه يا حامي الضعينه
تعاتب راعي الچفوف
٭ ٭ ٭
آنه عتبـــي ويــاك يفرق عتب مكفوله و كفيل
و إنته الدگيــت صدرك گلت كل حملـچ أشيل
إمشي يا زينـــب إبختــــي فنّه البخدرچ يعيل
چفوفي إللي تگود رحلچ عيوني أخليهه دليل
إجيت مأمنه بحماك تحله السفره وياك
گلت عينك علينه يا حامي الضعينه
تعاتب راعي الچفوف
٭ ٭ ٭
تالي يا خويه عفتنــي و راح كل ذاك الوعـــد
و آنــــي أطلع مــن مصيبه أوگـع بوحده أشد
ويه كل لوعه أذكرك جرحي ما يلگه الضمد
أگــــول لو وياي حاضر ما جِسَر واحــد أبد
يخويه إنته الجبتني بزودك طلعتني
بعهدك كلنه جينه يا حامي الضعينه
تعاتب راعي الچفوف
٭ ٭ ٭
آنه بالكوفه فگدتك و الگلـــب ساجر لهيب
طلّعو نســــوان منّه و إحنه ظلينه بنحيــب
شلون ما عدنه عشيره يلأخو و الله عجيب
و الگمــر علغبره نايم و البدر حالف يغيب
ظلينه وحدنه لا واحد سندنه
الكل متشمته بينه يا حامي الضعينه
تعاتب راعي الچفوف
٭ ٭ ٭
بالدرب كلساعـه أندبــك هوّ إسمـــــك ينّسه
بس أظل ألهـــــج بإسمك لو شمــر بيّه قِسه
يعني جدامي خيالك كل صبــاح و كل مسه
گلبي ما يسكن ونينه لا هجع لحظه و رسه
بس حزن و مصيبه متيسره و غريبه
يا خويه إنولينه يا حامي الضعينه
تعاتب راعي الچفوف
٭ ٭ ٭
صرنه يا خويـــــــه بمآسي رافگتنه إبهلدرب
أشرار ويانه بدربنه و تدري بالموقف صعب
محــــد يراعـــي هضمنه يلأخو شاب الگلب
ساعة العفتونه غربه و ابتده علينه الحـــرب
ما بين الطواغي وي بغي البواغي
شچايه اعتنينه يا حامي الضعينه
تعاتب راعي الچفوف
٭ ٭ ٭
علاء العبودي
3 / 12 / 2014
BY الحان الرادود مصطفى الكربلائي
Share with your friend now:
tgoop.com/mllemustafa/13722