tgoop.com/mllemustafa/13659
Last Update:
مهضومة رقية – بحر طويل
عد أشرار أميّه مهضومه رقيّه
صاحت بويه يحسين وينك يا ضوه العين
مهضومه رقيّه
* * *
من طبــع الطفل يحسين بحـب الأهــــــل يتعلّـگ
و البت إنعــرف عنهــه إعله أبوهه تحـن تتشبّگ
و إذا چـــان الأبو مثلك يحبهـــــه و بيهه يترفگ
حگهه من تموت إعليه كل منصف أطاهه الحگ
بالأيام الخليه عيشتهه رضيّه
و تالي الگلب نصين وينك يا ضوه العين
مهضومه رقيّه
* * *
رقيّـــه العـــاشت بظلك تبـــاريهه و تدللهــــه
و چــانت بالمهــد طفله تنـــــــاغيهه و تقبلهه
تحس بجـــالك بـــراحه حضنك چالمهد إلهه
حگــهه إعليك تتعــــوّد بمحنّه دوم شـــايلهه
تغرف من حنانك و تحس بأمانك
و اليوم أصبحت وين وينك يا ضوه العين
مهضومه رقيّه
* * *
العلاقه البينهه و بينك أبـــداً مو طبيعيّــــــه
مثل المـاي چنت إلهه و مثل النفس للريّـــه
إنته عـدهه مثل العيـد و شوفك إلهـه عيديّه
ما تگـدر عله فراگـك لأن إنته صرت هيّه
فرحانه بوجودك و مأمنه بزودك
منين الضيم إجه منين وينك يا ضوه العين
مهضومه رقيّه
* * *
لأرض الطف إجت ويـاك مرعــــــوبه و گلبهه احتار
تشوف الحرب و الأهـوال عليك إتشـــــاهد الأخطار
تـراقـب عينهه أفعـــــالك ويــــاك بكل كتـــر تندار
و ساعة من طحت يحسين چن الكــون عـدهه إنهار
مصيبتهه چبيره بعجيد العشيره
و سمعتهه الكـــــــونين وينك يا ضوه العين
مهضومه رقيّه
* * *
بعــــــــدك يسروهه الگوم يحسين و بيديهه حبـــــال
گلبهــــــه عليك يتــــــوجر شلون ترا فــــــگ الچتال
گبعت بالهضــــــــم عگبك يحسين و تردّه الحـــــــال
تذكرك كل وكـت كل حين و كل ساعه و دمعهه سال
و الطفله بيسرهه ما يهده فكرهه
تمنــت عگـــــبك البين وينك يا ضـــــــوه العين
مهضومه رقيّه
* * *
عليك إمـــــــــدوهنه ظلـت بدمعتــــهه و بـــونتهه
و طبت بالحـــــــزن للشام تلــــوذ بكتــــر عمتهه
و ساعه اللي تصـد للراس تبچّي الصخر عبرتهه
و بمجلس يزيد إلصــــــار زاد الطفله لـــــوعتهه
من تبچي اليتيمه حالتهه أليمه
بگلب الطفله جـــــــرحين وينك يا ضوه العين
مهضومه رقيّه
* * *
ظــــــل طيفك يلازمهه و إلجيتـــك تتـــــــــربّه
و ماتگـــدر عله فراگك عليهه فرگـــتك صعبــه
و بخـــربة الشام إهناك بعد ما تحمـــل الغــربه
صاحت وين أبويه وين إدموم المدمـــــع تصبّه
تريد إتشوف أبوهه و عدوانه ولوهه
وادم تطلـــــــــــــــب بدين وينك يا ضــــــوه العين
مهضومه رقيّه
* * *
ولن جابـــــو لعدهـه الراس بلچـــــن تنجلــــي الهموم
حضنت راســــــك و نحبت و گظت بالغربه يا مظلوم
لنهه بس جســـــــــد هـــامد و من الضعـف بس هدوم
و شافو بيهه ماضي السوط و ناحـت زينب و چلثوم
ماتت يا ولينه هالطفله الحزينه
من بچت الصــــــــوبين وينك يا ضــــوه العين
مهضومه رقيّه
* * *
علاء العبودي
3/1/2009
BY الحان الرادود مصطفى الكربلائي
Share with your friend now:
tgoop.com/mllemustafa/13659