tgoop.com/mllemustafa/13505
Last Update:
الوداع الأخير
گومن يابنات احسين خنودعه
واشعنده وصيّه ايوّصي وانسمعه
ــــــــــــــــــــــــــــــــــــــ
جابتهن واجت زينب لبو اليمه
وحده اتحب اديه والثانيه اتشمه
سدّ اكتاب ربّه وعدّل العِمّه
وظل ايسولفلهن شنهي الاملوعه
ــــــــــــــــــــــــــــــــــــــ
باچر گالهن سفرتنه محتومه
ولو شفتن جسد وامسلّبه اهدومه
گولن هذا ابونه الطاح بالحومه
ونوحن من بعيد وصُبّن الدمعه
ــــــــــــــــــــــــــــــــــــــ
رجائاً يالفواطم لا تجن يمّي
ولتصبغن عبيچن من نزف دمّي
خلنهه الخيول اتگطّع ابجسمي
اخاف احجابچن ذباحي ايگطعه
ــــــــــــــــــــــــــــــــــــــ
ولو شفتن طفل بذراعي متوسد
لاتبچن اخاف امن الذبح يگعد
عبد الله ينام ابحجري متعوّد
وهيه ابلا حرگ متطوّل الشمعه
ــــــــــــــــــــــــــــــــــــــ
لا تطلع مره امن اتشوفن الحاله
اخاف ايدوسچن حافر الخياله
الهي احسين يمّك امن اعياله
الهي وانته ابو الوگفات والفزعه
ــــــــــــــــــــــــــــــــــــــ
لن كلهن بچن واعيونهن حمره
وشبگنه وشبگهن حيل وبعبره
اختنگن والوجوه اتحولت صفره
ومن ينزل نفسهن بعد شيطلعه
ــــــــــــــــــــــــــــــــــــــ
گلهن يابناتي ورايد اوصيچن
من النار خافن تحرگ اعبيچن
باجر هالعدو بهيمه يخليچن
وحّدچن تباتن والجثث صرعه
ــــــــــــــــــــــــــــــــــــــ
علويّات نامن عالرمل گعده
نامن وانتچن وحده ابظهر وحده
ماريدن مره اعله الگاع ممتده
ولا ريدن مره امن السوط متوجعه
ــــــــــــــــــــــــــــــــــــــ
اتحملن يابناتي وهيّه حسبة شام
وراسي اعله الرمح خل يمشي ليگدام
ولو ذكرت ولدهه واسن ام جسّام
والتنعه اريدن بالگلب تنعه
ــــــــــــــــــــــــــــــــــــــ
وليلى من تشوف اگبالهه الاكبر
ذابل عالرمح وامسومر امن الحر
اخافن لو بچت ناگتهه تتعثر
واتطيح وچبيره اعله المره الوكعه
ــــــــــــــــــــــــــــــــــــــ
وعبدالله الطفل لمن تذكرنه
علويّات ونچن لا تظهرنه
روحن للرمح بالليل نزلنه
وخل امه الرباب اتشبگه واترضعه
ــــــــــــــــــــــــــــــــــــــ
وطبّن للقصر واحجابچن كامل
وحارسچن اوياچن راس ابو فاضل
اخوي وبالزعل عباس ميجامل
مثل خيبر قصرهم قادر يقلعه
محمد الجماسي
#اللهم_عجل_لوليك_الفرج
BY الحان الرادود مصطفى الكربلائي
Share with your friend now:
tgoop.com/mllemustafa/13505