tgoop.com/mllemustafa/13501
Last Update:
المن طالعه بهالليل تمشيـن
اذا لحسين هوه شضال بحسين
المن رايحه شتلكين منه
يزينب والحوافر طشرنه
خافن ماتعرفينه وتتيهين
ــــــــــــــــــــــــــــــــــــــ
رايحه المن يالغريبه بهالظلام وهالتلول
الف سيف والف جثه البينج وبينه تحول
شنهي تلكين منخيج ضال سالم حته اكول
ضلوعه ظلن بالحوافر وين تلكين الخيول
اخيج داست الخيل اعله صدره
يزينب طبكن ضلوعه اعله ظهره
كل وصله بنويه
اعلى كبر الغاضريه
جا من جسم اخوج شراح تلكين
ــــــــــــــــــــــــــــــــــــــ
ياهو اليـزتج يزينب ليهم وعباس نــام
وانتـي تعبانه يخيه وتــونه طفينه الخيام
ابن امج مغطين جسمه برمل ويضيعه الظلام
مثلم منالطعن كله وغيــرة لونه السهام
بلا رجال صعبه الليل ينداس
يالمتعوده يمشي وياج عباس
يخيه شلون ممشاج
وكفيلج موش وياج
يبعد اهلي شيردج للصواوين
ــــــــــــــــــــــــــــــــــــــ
الف طعنه والف ضربه والجرح فوك الجرح
وكلهم بـلا روس يختي شلون تلكين السمح
خيـه زينب همه كثــره وموش واحد منذبح
خيه ضلي ويانه هسه وبلكت نشوفه الصبح
باجـر بالضعن يمهــم يمــرون
وبلكت يرضه نوكف حادي الضعون
نحول يم السباع
ويحله انوب الوداع
وابدي اعتابج وكولي شتريدين
ــــــــــــــــــــــــــــــــــــــ
شويه خل تصير سفره والصبح لمن يجيج
موش مالت ليل يختي معلعه وشوفج رجيج
وسود مـن كثر المشاكف صايرات اديـج
ارتاحي لاتامشين هسه حسين مايعتب عليج
يم عون استراحي مروة الليل
طريج بعيد وانتي منيلج حيل
نامي شويه يم عون
اخــوتج مــايعتبــون
جبيره وهذا ليل وما تشوفين
ــــــــــــــــــــــــــــــــــــــ
خيه كافيجن سوالف انــه مــابيـاش روح
كاعـد متـانيني هسـه تعطلت خلنـي اروح
انـه اعـرف حسين اخيي ومايضيعنه الجروح
وشلون اتيهه وريحت امي بصدره وبنحره تفوح
جنـه يصيحلـي منبعيــد اسمعـه
بجف يوميلي بس مبتور اصبعه
شلون اكعد بصيوان
وبره حسين عريان
شيهود الكلب ويغمض العين
ــــــــــــــــــــــــــــــــــــــ
ما اتاني الصبح يبطي وكلبي مايحمل يطك
انه مــامتعـــوده اطول عن الحسين اختنك
راح اروحله بعباتي وهضمـي ومتوني الزرك
يكوملي منبعيد اخيي بس يشم ريحت حرك
شصبر والكلب لحسين مشتاك
بطيت وموش متعوده عللفراك
اريد اتمدد وياه
طول بطول وانعاه
واشوف صواب اخيي اليوجعه منين
ــــــــــــــــــــــــــــــــــــــ
طلعت الماكبل طالع صوتهت وتنكط خجل
هاي اول مره تمشــي وموش وياهــا الاهل
عثــرة بعــون بدربهـا وشافته وكالت فشــل
شلون اضل يمك ييمه وخالك مكطع وصل
ظلام ومـا اشـوفك واعثـرت بيك
ييمه ابجي اعلى خالك مابجي عليك
خالك ها يلوليد
بس لاعنك بعيد
دلوني اعلى جثة خالكم وين
الشاعر رائد الناشي
BY الحان الرادود مصطفى الكربلائي
Share with your friend now:
tgoop.com/mllemustafa/13501