tgoop.com/mllemustafa/13424
Last Update:
كلنا خدام الحسين – بحر طويل
خدامـك إحنه سيدي كل خطوه بسمك نقتــدي
ما يوم زلت هلجـدم نقســـم يبـــو اليمه قسم
كل خطوه بسمك نقتدي
٭ ٭ ٭
خدامـــك يبــو الأحـرار اسمـــع صوت خدامك
كلهه وياك حد المـــوت هـــاي أرگـاب جدامك
بالـــدم وقعــت يحسيـن أبد ما تنـــزل أعلامـك
أقره وجوهنه و تشوف حقيقه صارت أحلامك
كلنه نظل بخــــدمتـك ما يــــوم طخـــت رايتك
لآخر نفس نبقه خدم نقســـم يبـــو اليمه قسم
كل خطوه بسمك نقتدي
٭ ٭ ٭
الخدمه إلكل بشر صعبه بس يمك تظل سهله
الغيرك تبقه ذل و عـار و انته خدمتـك تحله
تلبسه اللي يخدمـك تاج بسوح الشرف يتعله
ما دامـك ملك علنــاس الخادم ما عرف ذله
انته الشرف كل الشرف الخادم بمولاه انعرف
منــــك تعلمنـــه القيـــم نقسم يبـو اليمه قسم
كل خطوه بسمك نقتدي
٭ ٭ ٭
ناس الماتعـــرف الدين تحسدنه عله الخدمـه
لأن ما عـدهـــه المثلك تطيع أمره و تلتزمه
حگه الوادي لو جعجع صعبه يوصل القمـه
يشوف القمـه بالأنوار و يظل عنوان للعتمه
الخادم يشــع وي سيده خطواته كلهه إمأيـده
من عزمك تزيد الهمــم نقسـم يبو اليمه قسم
كل خطوه بسمك نقتدي
٭ ٭ ٭
گالــو خدمتـــك بدعــــه جزه عليهه الزمن و أمضه
الشيعــه تعيش بالأوهام تحلـــــم حتـــــــه باليقضــه
تبقــه بالذنـــب تشعـــر بنــــار الذنــــــــب تتلضّــه
و إحنه نصيح منعوفك نقبــــض علجمـــــر نرضه
ميهمنه حچـــي الناصبــي وياك يا سبط النبــي
كل شيعي عالخدمه انفطم نقسم يبو اليمه قسم
كل خطوه بسمك نقتدي
٭ ٭ ٭
ردو گالــو اليخـــدم كـــــون عليــــه نتحــرك
علينه حركـو إعلام لگـــــونه بيــــــك نتبـرك
مهما دارت الأفلاك نبقــــه نــــدور بمجـــرك
ذبحـو فجـرو سلبـو و ظلينه إعله طوع أمرك
بنار العده لو نصطلـي صرختنه بسمك يلولي
نبقه ندوس إعله الألم نقســـم يبـو اليمه قسم
كل خطوه بسمك نقتدي
٭ ٭ ٭
عهدنه وياك ما ينبـــاع الشرف چا ياهو اليبيعه
خدمتك للشرف مقياس و كل الشـــرف للشيعه
اليخدم أكثـــــر انحييه نرفعه و أمـــره انطيعه
لأن وسامه من عندك يعلــــن بيــه ترفيعـــــه
محسود و الله اليخدمك چنه يحامـي إمخيمك
و ابختمك كتابه انختم نقسم يبو اليمه قسم
كل خطوه بسمك نقتدي
٭ ٭ ٭
علاء العبودي
6 / 1 / 2014
BY الحان الرادود مصطفى الكربلائي
Share with your friend now:
tgoop.com/mllemustafa/13424