tgoop.com/mllemustafa/13422
Last Update:
يالخذت كل امنياتي دعوتي وهيبة صلاتي
بعت عمري واشتريت
ريحتك لمن مشيت
بويه يحسين
.........................................
يالخذت وياك كلشي وانتضر منك جواب
وزعت دمعات عيني الجيتك بويه ثواب
آنه طفله وهم عليله وييني اوين العذاب
فدوه أرجع بويه ليه والله ذابحني الغياب
ذكره ذكره اتصفحتها صورتك لاما شفتها
آنه واجروحي نعيت
ريحتك لمن مشيت
بويه يحسين
.................................................
ويه ريح الهاب اودي جلمه وحده ماترد
خايفه ومحتاجه حضنك بويه كاتلني البرد
من يمر الليل طيفك يوصل البابي ويرد
كمت اسولف ويه روحي واقره ياروحي الحمد
ميته وشوكك حياني اليا وكت ابقى اتاني
آه لو تدري شبجيت
ريحتك لمن مشيت
بويه يحسين
.............................................
اباب بيتي رايحه اكعد وانتضر نورك يشع
الطفله من تبجي اعله ابوها تبتسم وتصب دمع
خضر بخدي حنانك خايفه لا ينكطع
لحضه لو ترجعلي بويه لشعل العشره شمع
يا حسافه ويا هضيمه بويه احس روحي يتيمه
الموت اجاني وما اجيت
ريحتك لمن مشيت
بويه يحسن
...............................................
يوسف امن اغيابه طول ودى للوالد خبر
القميص وخله عطره حتى يرجعله النضر
فدوه وديلي حنانك مو ترى كلبي انكسر
عايشه والحمد لله امشي محنية ضهر
حايره والحيره حيره لا اهل عندي وعشيره
بويه من بعدك عميت
ريحتك لمن مشيت
بويه يحسين
..................................................
اتفكدت حيطان بيتي غرفه غرفه اتفكدت
جنت مرعوبه وشعوري من على طولي طحت
استنشقت نفحة عبيرك انتعش كلبي وكمت
عاينت خالي مكانك هسه بويه أيست
خايفه والبيت وحشه ويه نعشك شال نعشه
روحي ذبلت وانتهيت
ريحتك لمن مشيت
بويه يحسين
...............................................
خادم خدمة الحسين
الشاعر
محمد الموالي
BY الحان الرادود مصطفى الكربلائي
Share with your friend now:
tgoop.com/mllemustafa/13422