tgoop.com/mllemustafa/13393
Last Update:
هلالية مقدمة مجلس 2022
لحظه ما انسه العشت وياهم
الدنيا ظلمه وموحشه بفرگاهم
يامحرم. يامحرم
...............
عشت مهيوبه بعهدهم راسي عالي
بين اخوتي ولانظر واحد خيالي
جارت علينه النواصب والليالي
ذبحوا خواني وبقيت بلايه والي
للمنيّــة روحـي ما تنســاهم
الدنيا ظلمه وموحشه بفرگاهم
يامحرم. يامحرم
..............
حسين والعباس مشغوله بذكرهم
فراگهم يچوي الگلب يكتل هجرهم
يامحرّم عايشه ابّالي صورهم
فارگوني بكربله وضحّوا عمرهم
لخوتي مشتاگه وين الگاهم
الدنيا ظلمه وموحشه بفرگاهم
يامحرم. يامحرم
..............
يا محرم لا تهل تجرح دليلي
حيل ما ظل بالمصايب راح حيلي
نهاري يگضي بالدمع والنوح ليلي
عله خوتي ما ينگطع وني وعويلي
راحوا العشت العمر بحماهم
الدنيا ظلمه وموحشه بفرگاهم
يامحرم. يامحرم
..............
بعاشر ايامك محرم چم رزيه
بعيني شفت حسين طايح عالوطيه
گطّعوا جسمه النواصب آل اميه
وداست بصدره الخيول الأعوجيه
ما خضع ليّزِيد وتحداهم
الدنيا ظلمه وموحشه بفرگاهم
يامحرم. يامحرم
..............
يامحرم عالنهر شفت الفجيعه
طايح العباس وچفوفه گطيعه
من بعدهم سلبوا ابنات الوديعه
عذّبونه وضاگت علينه الوسيعه
عالنهر طاح اللذي ذلّاهم
الدنيا ظلمه وموحشه بفرگاهم
يامحرم. يامحرم
..............
آنه زينب يا محرم حن علية
لا تذكّرني بمصابي الصار بية
من رحت للشام مچتوفه وسبية
ريت ميته شگد تمنّيت المنية
وين اخوتي تعذّبت بجفاهم
الدنيا ظلمه وموحشه بفرگاهم
يامحرم. يامحرم
سيد زيد الفحام
___________
BY الحان الرادود مصطفى الكربلائي
Share with your friend now:
tgoop.com/mllemustafa/13393