tgoop.com/mllemustafa/12530
Last Update:
صِدَر للكاظم قرار ... بالسجن ليل ونهار
وينه هارون ويشوف ... هالسجن صاير مزار
...........................
زمرة الشر والضلال رادو اليوم انتقام
كالو الكاظم خطير لازم يعيش بظلام
محّد يزوره ويشوف ينمنع من الكلام
هذا من آل الرسول عدنه ويّاهم خصام
.........
كالو يشوف العذاب .. موسى يتوسد تراب
واليخالفنه يموت .. والظلم عدهم شعار
*
ما نقارن بالمصاب الحَكَم رب السماء
مو مثل يوسف اكيد موسى اكثر بالبلاء
مو فقط احنه نكول للسمه هذا النداء
بس علي وضلع البتول واكثر الكل كربلاء
..........
عالرمح راس الشهيد .. والضلع رد من جديد
وانطبر راس الامام .. صار ذاك وهذا صار
*
موسى قرآن الاله والبشر كلهه تكول
تسجد املاك السماء لو سجد ابن الرسول
هذا ابن خير الرجال هذا ابن ذيج البتول
شلون مسموم ويموت وينهم اهل العقول
..........
جن كتاب الله يطيح .. والنبي واكف يصيح
ليش مسموم الشريف .. بجبدته مستعره نار
*
هذا قانون الزمان لازم اهل الحق تموت
واليكل للذله لا مايظل بالدنيا صوت
مايطالب للفقير يلتزم طبع السكوت
والينادي بالخلاص للسجن طبعا يفوت
......
سكّتوا اهل الضمير .. والفقير يظل فقير
واليصيح بصوته لا .. عرفو بصوته انتصار
****
الظلـم لا ما يـدوم يسـتمر هـذا مُحــال
الكاظم عله الطاغي ثار والسجن ساحة قتال
شفنـه هـارون ويزيـد كل ممالكـهم زوال
واليخونون الشـريف ذولـه اشباه الرجـال
..........
احنه بالله نستعين .. من علي وثورة حسين
ما نهادن مستحيل .. مو طبع بينه الفرار
****
صار ملهمنه الامام بالسجن لاجنه صاح
الليل طبعه مايدوم لازم يتبعه صباح
والسيوف اللي تثور تنتخي بعزم الرماح
باجر المهدي يصيح عالظلم ساعة كفاح
.........
يلا يامهدينه عود ... تنتظر هاي الجنود
يالثارت الحسين ... بعد مابينه انتظار
الشاعر سيد علي المدني
BY الحان الرادود مصطفى الكربلائي
Share with your friend now:
tgoop.com/mllemustafa/12530