tgoop.com/mllemustafa/12280
Last Update:
يمه وينج ليش للطف ما أجيتي
يمه وينج عليه حيل تأخريتي
آنه جوه الخيل ونظر للنهر // بصدري جم حافر ترك يايمه أثر
*
يم البنين اشكد حجي اختصره الج بحجايه
لمن طحت من المهر الخيل اعتنتني عنايه
وكلما أجر يمه النفس يوجعني صدري اهوايه
يم الوفه وذاك النهر جارحني حيل ابمايه
يجري دمي وعالترب ظليت انازع
يجري دمي من أيدي أصبع يمه ضايع
بنحري لو تدرين جم سيف العثر // بصدري جم حافر ترك يايمه أثر
****
عن كربله احجيلج ردت منها شفت يمه الويل
حر وعطش نار وحرك واطفالي دمعتها اتسيل
ياحسرة الفاكد أخو مني خذت كل الحيل
ومن كثر ما صدري انهشم أكره كمت جلمة خيل
شحجي عنها الخيل ماعدها مشاعر
شحجي عنها بصدري مطبوعه الحوافر
جم ضلع يمه بضلع مني انكسر // بصدري جم حافر ترك يايمه أثر
*
هذا الي يكطع خنصري ويطعني ذاك برمحه
وهذا اليكله ياشمر لترحمه زيد جرحه
حط سيفك بنص منحره وكون عله كيف اتذبحه
ويايمه راسي عله الرمح خايف رقيه تلمحه
راسي نزله اكبال طفله لا ترفعه
راسي نزله بعيني ماخليت دمعه
والرقيه اهواي كمت اربي النظر // بصدري جم حافر ترك يايمه أثر
*
تدريني عطشان شكثر وحرموني يمه من الماي
ايضللي ياهو من الشمس كربله مابيها افياي
بالخيل يمه من طحت كامو يسحكوني اهواي
وكعدت شفت يمي مره بس لا صحت زينب هاي
خويه ارجعي الخيل كل خوفي تسحكج
خويه ارجعي صدر ماعندي وشبكج
حيل يوجعني تره سهم الظهر // بصدري جم حافر ترك يايمه أثر
*
يم البنين من الشمس تغيرت حيل ارسومي
مرمي عله وجهي والعده سلبوني حته اهدومي
زينب اجت ليه تون وتمسح غدت بدمومي
راحو يحركون الخيم بساعج بزينب كومي
والله حيره خويه حيرني زماني
والله حيره ذبحتي ظليت اتاني
بعد ساعه خويه ينحز النحر // بصدري جم حافر ترك يايمه أثر
****
تربع على صدري الشمر وظل يذبح عله كيفه
يمه ضربني بالنحر أثنعش ضربه بسيفه
وزينب تكله ياشمر لتذبحه خايب عيفه
ابن أمي عطشان شكثر وتارس عيوني بطيفه
عوفه نايم خلهن ايطيبن جروحه
عوفه نايم شكد عزيزه حسين روحه
شفته كام ايصيح ايتامي بخطر // بصدري جم حافر ترك يايمه أثر
***
تمت
ميثم العمري
BY الحان الرادود مصطفى الكربلائي
Share with your friend now:
tgoop.com/mllemustafa/12280