tgoop.com/mllemustafa/10937
Last Update:
أخذي عمري انطيني عين
ابچي بيها اعله الحسين
رافع ايدي بالدعاء ،، امروّتچ يم البنين
اخذي عمري ،، اخذي كلشي
والاريده ابكل زمان ،، ابمجلسج الگه مكان
وماكو حاجز بين ايدي وبين صدري
أخذي عمري
ولبّسيني الدمعه ثوب ،، علوگع من مهره نوب ،، ونوب عالسلبو خدرها وعظّمي أجري
علّميني أعشگ مصاب
اشلون التذ بالعذاب
يحزن اليعشگ غريب
اشلون باليعشگ حزين
امروّتچ يم البنين
أمنياتي ،، أبقى اجدّي
واسجد ابابچ ذليل ،، ومنّج أقنع بالقليل ،، والقليل المنچ اهوايه عليه
أمنياتي
عني ترضين واصير ،، عبد عند أشرف أمير ،، وجمره من امخيمه زرعيها بيه
اطيني مهجه أبچي واصيح
حرگو اخيام الذبيح
وشيعو ضعن العفاف
والغرب الامشيعين
امروّتچ يم البنين
يالحنينه.. أخذي روحي
وبدّلي اسنيني جروح .. وعلميني اشلون انوح
يلي من نوحچ بنو طف بالمدينه
يالحنينه
أخذي عمري انطيني آه ،، على العطشان وضماه .. وعلّميني أمن اعطش اصرخ ياسكينه
انه اعاين بس لاديج
العدو بچيتيه عليچ
بچي گلبي اعله الخيام
ابگبلج الينزف حنين
امروّتچ يم البنين
علميني ،، اشلون ابچي
اشلون احب اشلون اهيم ،، واحترگ نار ابهشيم
على الحرگو خيمة أخته ايضج ونيني
علميني
اشلون أعيش الغربه نار ،، وابچي للماعدها دار ،، وإيد الطم عالصدر وايد اعله عيني
فدوه ارزقيني دموع
ورحله مابيها رجوع
لو أرد مجنون اصير
لو أموت أمن الونين
امروّتچ يم البنين
بيدج إنتي ،، اخذي گلبي
فرّغيه وامليه غرام .. وجمر من ذيچ الخيام
وخلي شوغات الضمه اتفور ابحسرتي
بيدچ إنتي
علّميني ألحب وصال ،، والعطش لون الجمال ،، وآدميتي اعرفها من تنزل دمعتي
سوّي كل أيامي ليل
وللبواچي اطيني حيل
شيخ هاشم يستغيث
وماكو ناصر لامعين
امروّتچ يم البنين
الشاعر أحمد الهلباوي
BY الحان الرادود مصطفى الكربلائي
Share with your friend now:
tgoop.com/mllemustafa/10937