tgoop.com/m_o_o_8_5/11083
Create:
Last Update:
Last Update:
گوزل اللهین آدیلان
( اعتنا)
۱۴٠۴/۴/۳
بلبل گوله خاطر ائله مز خاره اعتنا
هر جوره دؤزر ایله مز آزاره اعتنا
گول اوسته قویار باشینی جانین وئرر الدن
اصلا ائله مز خار سیه ماره اعتنا
منقاره آلیب برگ گولی عشق ائدر اونلا
دؤشده ائله مز خاردن آثاره اعتنا
یاره گوره مین یاره گوروب نالیه گلمز
مطلق ائله مز خار ستمکاره اعتنا
بیگانه سوزون هر نه اولا قلبینه آلماز
اصلا ائله مز حجوه و گفتاره اعتنا
بازار قضاوت ده متاعین ساتار عالم
بلبل ائله مز بیر بئله بازاره اعتنا
افکار خلایق ده تصرّف اولا حاشا
خوشبخت اودور ائتمز بئله افکاره اعتنا
تاریکی محض اولموش اگر عالمه چیره
نور ایلیه حاشا کی شب تاره اعتنا
عاشق بلی عالم ده گرک هر غمه دؤزسون
منصور ائله مز ذرّه سر داره اعتنا
سعی ائتسن ( هدایت) اولاسان گر زکریّا
دوغرانسان اگر ایلمه منشاره اعتنا
محمد هدایت🌴
🌴🌴
BY 🌴 پاتوق اشعار رفقا و دوستان🌴
Share with your friend now:
tgoop.com/m_o_o_8_5/11083