tgoop.com/lx_lv/19971
Last Update:
يوم عرفه.
١- المغرب هيأذن يوم الأثنين وبكدا بدأت ليلة أهم يوم في حياتك.
هتنوي صيام يوم عرفة وهتردد التكبيرات على قد ما تقدر.
الله أكبر الله أكبر الله أكبر، لا إله إلا الله، الله أكبر الله أكبر الله أكبر ولله الحمد.
- هتنام الساعة ١٠ أو ١١ كدا وتظبط المنبه على ٢ بالكتير عشان تصحى تبدأ يومك بتركيز.
هتصحى تتسحر، وتتوضى وتقعد في ركن تخصصه لنفسك، تقيم الليل على قد ما تقدر من الركعات، وتفضل تستغفر وتذكر الله لحد ما الفجر يأذن.
الفجر أذن دقت ساعة العمل واليوم بيبدأ
- الموبيل بنسبالك هيبقى عبارة عن حديدة حرفيًا هتقفله تمامًا.
- هتصلي سنة الفجر (خير من الدنيا وما فيها)
- هتصلي الفجر (ياريت في جماعة)
- هتقول أذكار الصباح وتقعد تذكر الله وممكن تقرأ جزء من القرآن لحد الشروق.
هتصلي ركعتين الضحى (على فكرة لو صليت الفجر في جماعة وقعدت تذكر الله وبعد كدا صليت الضحى يكتب لك أجر عمرة وحجة تامة) إن شاء الله.
- هتقعد في خلوة مع نفسك وتدعي بكل اللي بتتمناه من القائمة اللي كتبتها وتكمل ذكر الله خصوصًا (لا إله إلا الله وحدة لا شريك له، له الملك وله الحمد وهو على كل شيء قدير).
ممكن تنام وتريح ساعتين قبل الضهر، وأول ما تصحى هات الحجاج على التليفزيون من أكتر الحاجات اللي بتحسسني بالشعائر وبتأثر فيا، وأدعي بكل اللي بتتمناه، وردد التكبيرات معاهم.
شغل البيت اعمليه عادي جدًا بس خلي لسانك ميقفش عن ذكر الله، وممكن تعلقي ستيكي نوتس جنب الحوض في المطبخ عشان تفتكري كل شوية.
مجرد ما العصر يأذن، اقعد مع نفسك، قول أذكار المساء، استغفر كتير، ادعي بكل اللي بتتمناه، توب لله واطلب منه أنه يعفو عنك ويتقبل توبتك وصيامك (صيام يوم عرفة يكفر سنتين) وادعي بكل حاجة حتى لو بنسبالك مستحيل تتحقق، دعاء يوم عرفة بيحقق معجزات، وهتفضل مكمل بين الدعاء والذكر لحد المغرب، وزي ما اتفقنا مفيش موبيل، قلبك محتاج لله وبس، عوض كل البُعد اللي فات.
١٣- هتحس إن اليوم متعب شوية بس تخيل إن في ناس تانية هتكون في الوقت ده على جبل عرفات وشوف حجم المشقة اللي شافوها عشان ينالوا رضا الله، مش قادر تتعب كام ساعة وأنت في بيتك؟
جدد النية، ده أعظم يوم في السنة كلها وياعالم هندركه السنة الجاية ولالا فأوعى تضيعه من إيدك.
{اليوم أكملت لكم دينكم واتممت عليكم نعمتي ورضيت لكم الإسلام دينًا}
- ربنا يتقبل منا ومنكم.
منقول
BY المتفائلات بالفردوس🌱
Share with your friend now:
tgoop.com/lx_lv/19971