tgoop.com/lx_lv/19970
Last Update:
ذِكر الموت بيرعبني !
السلام عليكم ورحمة الله وبركاته، بفضل الله وتوفيقه بذكر نفسي وبذكركم إن مش معنى إننا بنشوف الموت كتير حوالينا يبقى خلاص نقفل على نفسنا والخوف عندنا يزيد للدرجة اللي توصلنا والعياذ بالله لليأس وننسى احنا جايين الدنيا ليه وبنسعى لايه، لازم نفتكر كويس إن الله عز وچل لا يحب إن عبده المؤمن يكون حزين ويائس من كل حاجة، الموت بيكون تذكرة لنا علشان نحسِّن من نفسنا ونتذكر إنا لله وإنا إليه راچعون
نتذكر إننا راچعون لله الكريم الجميل الرحمن الرحيم اللطيف بعباده فنشتاق لرؤيته سبحانه وتعالى، افرحوا بالله وبدين الإسلام وبنعم ربنا عليكم من علم وزواج وأولاد وغيرهم من النعم اللي مغرقانا الحمد لله
لو عِشنا مع كلام ربنا أرحم الراحمين سبحانه وتعالى قلوبنا فعلا هترتاح مهما يحصل حوالينا من فتن ومصائب، سبحان الله كلام ربنا فيه فعلا سكينة وطمأنينة مستحيل ناخدها من أي كتاب تاني بالمنظر دا
فبدل أما نترعب من الموت ونيأس، لأ كل واحد يراجع نفسه ويشوف هو محتاج يصلح ايه ويزود ايه ويستعين بالله ويعمله
قال تعالى: {لَيسَ عَلَى الَّذينَ آمَنوا وَعَمِلُوا الصّالِحاتِ جُناحٌ فيما طَعِموا إِذا مَا اتَّقَوا وَآمَنوا وَعَمِلُوا الصّالِحاتِ ثُمَّ اتَّقَوا وَآمَنوا ثُمَّ اتَّقَوا وَأَحسَنوا وَاللَّهُ يُحِبُّ المُحسِنينَ﴾ [المائدة: ٩٣]
قال تعالى: {إِنَّ الَّذينَ آمَنوا وَعَمِلُوا الصّالِحاتِ وَأَقامُوا الصَّلاةَ وَآتَوُا الزَّكاةَ لَهُم أَجرُهُم عِندَ رَبِّهِم وَلا خَوفٌ عليهم ولا هم يحزنون}. [البقرة : ٢٧٧]
فافرحوا واحمدوا ربنا إننا هنروحله وبإذن الله هنعيش في الجنة اللي فيها ما لا عين رأت ولا أذن سمعت ولا خطر على قلب بشر، الجنة اللي بمجرد ما بنسمع سيرتها قلوبنا بتكون نفسها كدا تتخلع من مكانها وتروحلها وتسيب الدنيا الفانية دي، ما بالكم بقى لو عشنا فيها فعلا بأرواحنا وأجسادنا هنكون حاسين بايه !
قال تعالى: {وَسارِعوا إِلى مَغفِرَةٍ مِن رَبِّكُم وَجَنَّةٍ عَرضُهَا السَّماواتُ وَالأَرضُ أُعِدَّت لِلمُتَّقينَ﴾ [آل عمران: ١٣٣]
سبحانك اللهم وبحمدك أشهد أن لا إله إلا أنت أستغفرك وأتوب إليك
#كلموا_الناس_عن_ربنا
#صلوا_على_الحبيب
#عائلة_المتفائلات_بالفردوس
BY المتفائلات بالفردوس🌱
Share with your friend now:
tgoop.com/lx_lv/19970