tgoop.com/loukman001/103287
Last Update:
😂😂يوميات مواطن مبسوووط 😂😂
يوم التعزيل ...
يوم طويل عصيب بتكرهو كل العيلة...
تتقلد فيو الأم منصب القائد الاعلى للعمليات وتعلن النفير العام ..
و على الجميع الإلتحاق بالتجنيد الإجباري لأداء الخدمة الإلزامية ..
مافي إعفاءات ولا واسطات ولا دفع بدل..
النق فيه ممنوع .. واﻹعتراض غير مقبول ..
والكل بدو يشتغل حسب تعليمات سيادة #نبع_الحنان..
في يوم التعزيل تعم الفوضى أرجاء البيت ..
سطولة مي مبحوته هون و هون ...
خلطات مبتكرة من المنظفات تعبق روايحها بالمكان
شقف ناشفة وشقف مبلوله.
شبابيك مخلوعه .. السيبه عم تكذدر .. المسجله عم تلعلع
و الغسالة عم تصرخ وتستريح من كوم الغسيل حواليها ..
الشراشف .. والبرادي .. وحتى دباديب الأولاد بيلحقن غسله ...
الأب بشمّع الخيط من الصبح وبتكفل بتأمين الدعم الغذائي الجاهز لكتيبة التنضيف لأنو بهاليوم ما في طبخ ولا نفخ.. شوية نقرشات وسندويشات.. ع الماشي حتى بدون كاسة شاي...
بتبلش المعركة بمناوشات ومناورات خفيفة هون وهون ..
مسح غبره .. مسح تريات .. تلميع البللور .. جرجرة المفروشات .. تخباية الصمديات ..
ثم تعلن ست البيت رسمياً انطلاق فعاليات تعزيل الحيطان وبيشتغل الفرك ..
أول وش وتاني وش وتالت وش وكل ما بتخلص شقفه بتعمل نظره ثاقبه ومقارنه بين
( قبل و بعد )
وبتعطيا ابتسامه رضا خفيفة هيه كلمة السر للإنتقال تكتيكيا لشقفه تانيه من الحيط ...
وهيك بتضل الكتيبه عم تنتقل من سقف لحيط ومن أوضه لدهليز لحتى تنهدّ الأكتاف وتنحلّ المفاصل وتفنش الإيدين وتضع الحرب أوزارها وتعم النضافه أرجاء المعموره
استراحه قصيره مع غروب الشمس .. تنهيدة قوية و عنين و عزف لسمفونيه آخخ يا أمي وآخ يا ابوي..
ثم تقوم الأم و مساعديها المرضيين قومة رجل واحد و برجّعو كلشي لمحلو ..
وتختلط مشاعر الفرح بإنتهاء أصعب واتقل يوم بالسنه بمشاعر الحزن على ضحايا التعزيل ..
فازة تقيلة انكسرت ..
كريستالة تريا وقعت ..
برداية كشت عالغسيل ..
وخدوش وجروح متفرقه في أنحاء الجسم.. هادا إذا ما زحط حدا على ضهرو أو إنفجر راسو.. بهالاحتفال الأليم .
وكل عام وانتم بتعزيل نضيف...
هلأ كلنا عم نركض لنخلص قبل #الوقفات
😂😂😂😂
@loukman2025 ✍
https://www.tgoop.com/loukman001
🌀شــاركها من عنا وخلي الكــل👨👩👦👦يتهــناⓂ️
👉من هنا
BY يوميات مواطن مبسووووط
Share with your friend now:
tgoop.com/loukman001/103287