tgoop.com/llhgad/3398
Last Update:
2⃣6⃣
رمضان آخر روقان 🎆🌜
6⃣ تروايح وقيام ليل .. بروقان ..
صلاة التراويح في رمضان من أروع الحاجات اللي بتسعد القلوب وتصلحها...ودول ٣٠ يوم في السنة كلها اللي بتصليها فيهم، فاجتهد
إنك تحافظ عليها وتجدد نيتك فيها علشان تكون من المغفور لهم، اللي النبي ﷺ قال عنهم :( من قام رمضان إيمانا واحتسابًا
غفر له ما تقدم من ذنبه ) متفق عليه
📝 وخد شوية النصايح دي لعلها تنفعك بإذن الله:
🕌 خلى أكلك خفيف على الفطار علشان متتعبش، علشان ماتلاقيش الحموضة اشتغلت والقولون اشتغل، وتضيع الليلة منك !!
وكمان علشان تعرف تركز في الصلاة، لأنك لو تقلت في الأكل هتهبط ويجيلك خمول وغالبًا هتنام أو أكيد هتنام حتى وإنت بتصلي !!!
ف حاول متخليش أكلك كله على مرة واحدة، يعني في الفترة من ما بعد المغرب لحد السحور ممكن تاكل أكتر من وجبة خفيفة
ده هيريحك جامد بإذن الله
🕌 وبلاش تشرب ميه كتير بعد الأكل مباشرة مش هتعرف تهضم وهتلاقي نفسك تقيل جدًا ومش قادر حتى تاخد نَفَسَك !! وهتفتكر
النصيحة دي ساعتها ..
اشرب ميه قبل الأكل براحتك وكذلك طول الليل، اشرب مياه كتير علشان تعوّض كمية السوائل اللي بتفقدها بالنهار
🕌 لازم تكون واخد قسط كويس من النوم، علشان ماتنامش وإنت بتصلي زي ما بنشوفه بيحصل لناس كتير !
واتفقنا قبل كده على تظبيط مواعيد النوم من قبل رمضان..
🕌 اختار مسجد هادي تصلي فيه، حتى لو بعيد،حتى لو في بلد تاني.. المسجد من أهم عوامل الخشوع في الصلاة..
لأنك لو هتصلي في مسجد فيه أطفال بتلعب طول الصلاة، أو ناس كبار بتتكلم وتتخانق على الكبيرة والصغيرة، أو شباب بيعمل دوشة ؛ صدقني مش هتعرف تخشع أبدا !
ويا سلام بقى لو الإمام كمان صوته هادي وخاشع وبيقرأ بمقدار آيات مناسب .. يبقى كده تمام أوي ..
🕌 لااااااااااازم تكون عارف الجزء اللي هيتقرأ في التراويح، وتكون محضره كويس ومجهز تفسيره...
ده هيخليك مركّز مع الإمام وهو بيقرأ، وماتبقاش قاعد مستني امتى هتخلص السورة وامتى الإمام هيركع ؟
✅ حاول تركّز مع كل آية، ركّز مع القرآن واسمعه بقلبك وافهم الكلام اللي بتسمعه علشان تعرف تستمتع بالتراويح ومتحسش بالتعب، علشان تطلع من الصلاة بقلب عاش مع آيات الله وارتوى من معانيها وارتقى في درجات الإيمان
⬅️ ويا ريت لو تقدر تستغل الوقت اللي معظم الناس بتضيعه ما بين المغرب والعشاء بعد الفطار في إنك تقرأ الجزء ده وتراجع تفسيره .
🕌 أما بالنسبة لصلاة القيام أو التهجد : فهي صلاة خاصة بينك وبين الله، في وقت خاص، وقت تَنَزّل الملك ل للسماء الدنيا، وهو ينادي كما جاء في الحديث القدسي :
هل من سائل فأعطيه ؟ مفيش حد محتاج أي حاجة وأنا أديهاله ؟
هل من مستغفر فأغفر له ؟ مفيش حد مذنب يستغفر وأنا أغفر له ؟
هل من تائب فأتوب عليه ؟ مفيش حد نفسه يتوب وأنا أتوب عليه ؟
الحديث ده لوحده كافي إنه يخليك مشتاق لقيام الليل !
🤎 أحد الشباب ثابت على قيام الليل يومياً من يوم ما التزم علشان كلمة واحدة سمعها ! سمع واحد بيقول :
"اوعى تضيع معادك مع الملك كل ليلة مهما كانت الظروف !"
✅ ركعتين القيام دول شرفك .. كما قال النبي ﷺ (شرف المؤمن قيامه بالليل ) .. ركعتين تطفي النور أو تنوّر نور خافت وخفيف يخليك تعرف تخشع بين يدي الله عزوجل
✅ ركعتين ترتل القرآن فيهم بتجويده وإحسان قراءته وتحسين الصوت وتعيش بقلبك مع القرآن ولو هتقرأ بسورة واحدة زي سورة ق أو يس أو الواقعة أو الملك أو الحاقة أو الفجر
⬅️ أهم شئ تقرأ بتأني وتكرّر الآيات المؤثرة وتتدبَّر فيها وتحاول تعصر قلبك وتخلّي عنيك تدمع من خشية الله..
⬅️ ركعتين تطول فيهم السجود وتقعد بقى تطلب أمنياتك وأحلامك
#يتبع بإذن الله
#رمضان_آخر_روقان
#مصطفى_زايد
#افتح_لي_قلبك
https://bit.ly/3jlHlO7
BY للحجاب اهتديت💚✨
Share with your friend now:
tgoop.com/llhgad/3398