tgoop.com/llhgad/2971
Last Update:
قبل فترة كنتَ لصيقة بي صحبتي وقت الولد اللي كان عايزها قرر فجأة إنو ما عايِزها في عز تمسّكها هي بالأمر!
البكا، والدموع طول الليل، وشعور الخذلان واللَّا كِفَاية
مشية الإنكسار وضيق الأرض بيها رغم اتِّساعها
اختفاء ابتسامتها المعهودة، وصوتها البقينا ما بنسمعو إلا من مرة لي مرة وهي الما كان بسكُت ليها حِس!
تقريبًا أغلبنا لو ما مَرَّ بالفترة دي، بكون عندو عزيز عليهو مرَّا بيها وعاشها ..!
بعد فترة
رجعت من تاني تبارك الرحمن، وردة مُفرهدة، بشوشة وصوت ضحكتها رجع يعلا ويملا البيت والجامعة واللَّمات
ولمَّا سألتها عن سِرّ التجاوُز قالت لي:
(دعوات رمضان وسورة البقرة كل يوم كاملة بدون انقطاع)!
أنا بكيت لي ربَّنا، وربَّنا جَبَر خاطري!
في الحقيقة
ح نلاقي ناس كتار أصحاب خواطر مكسورة، قليل مننا بعرف الدرب الصاح وكيف يرمّم كسرو ده ويتجاوز
الحياة محطات كتيرة، ابتلاءات متوالِيَة، وكل محطة فيها كفيلة تستنزف كل الطاقة الجوّاك
ما لَم يكون عندك مصدر حقيقي تستَقِي وتستَمِدّي طاقتك مِنّو
ح يجي يوم وتكوني منهارة تمامًا وما شايفة حل قدامك غير إنك تقعي البحر!!
رمضان فُرصة اتحرم منها كتير غيرنا، الما مسلمين، واللي سبقونا لي ربنا واتوفّو قبل يدركو الشهر الفضيل
استجمعي شتات نفسك، قرري كل يوم تبدي من أول وجديد طالما لسه فيك نَفَس وروح يبقى انتِ بإذن الله قادرة تتجاوزي كل شي، وتنجحي من تاني بعد كل عَترة
-في جميع مناحي الحياة، ما بس في العلاقات-
اتذكري حديث: "إن الله لا يَمَل حَتَّى تَمَلُّوا" ..
البُشرَى الجميلة
إنو صحبتي دي، زواجها في العيد بإذن الله، وحاسة كأنه واللهِ خاطري أنا اللي اتجَبَر ما خاطرها
فاللَّهُمَّ كل صاحب خاطر مكسور، تجبر خاطرنا فيهو وتسعِدو♥️
في الخِتَام:
لا تبرحي الأبواب حَتَّى تبلُغِي♥️! ..
#صفِيّة_مُصطفى
BY للحجاب اهتديت💚✨
Share with your friend now:
tgoop.com/llhgad/2971