tgoop.com/lammiif/3600
Last Update:
Mimmiyoo Jaalalaa
=================
*Kutaa 4rreessoo
~> Falmataan poolisoota dhalootaan Oromoo ta’an keessa
hiriyyoota hedduu qaba. Isaan keessaa isa tokkoon xalayaa
kana barattuu seenaa jedhamtutti naaf geessi jedheen!
Xalayichi akkas jedha:
[Seenaa koo sihaa gahu nageenyikoo,
akkami nagaadhaa?. Baay’ee siyaade seenaakoo. Onneen koo
jaalala sabaaf jaalala keetiin iddoo lamatti qoodamtee
gubachaa jira. Miidhaafi dararaan narra gahes kanuma Oromoo
jaarraa tokkoof irra gahaa ture sana. Hanga bilisummaa
argannee biyya dhalannerratti; akka namaatti jiraannutti, jaalala
keenya galmaan gahuun ni’ulfaata.
Ammaaf mana murtiitti nadhiyeessanii waggaa saddeet (8)
natti murteessaniiru. Seenaakoo ani jaalala ijoollummaa keetti
taphachuu hinfedhu. Hanga ani hidhaa kana keessaa bahutti
obsitee yoo na’eegde hawwii kooti. Yoo taa’uu baattes wanti
gaariin akka siqunnamu Rabbiin siif kadha halkaniif guyyaa.
Sirba Dr. Kabajaa aartisti Alii Birraa “Sila osoo beekee,
waasillee hindararu” jedhu jedhu si’affeereera. Seenaakoo
baay’ee sijaaladha. Mana hidhaa maayikalaawii irraa
nagayatti…” jedhe.]
Erga dubbistee booda; seenaan naasuudhaan lafatti kuftee,
yeroo muraasaaf hafuurrishee dhokate. Poolisichi hatattamaan
gara mana yaalaa geessee sa’aa lama booda ofi barte. Erga
ofi bartee “adaraa Oromummaa xalayaa kana barreessee sitti
kennaa na’eegi” jetteen. Xalayaa akkas jedhu barreessiteef…
[Falmeekoo sihaa gahu nageenyikoo kan onnee irraa madde
jaalaalaafi kabanyi ani siif qabu yoomiyyuu daangaa hinqabu.
Kaayyoon keenya akka galma gahuuf halkaniifi guyyaa hinrafu.
Falmeekoo jabaadhu irree jabeeffadhu. Anaaf waggaan
saddeetii (8) boru ganamaadha. Waan baay’ee seenaa
harmeekoo irraa baradheera. Lubbuun inuma jirtaa garuu?.
Kana yerooma si’arge kan amanu. Rifeensikee odaa fakkaatu
suni jiraa laata?. Falmeekoo onneenkoo jaalala keetiin
hidhamteetti. Anis jaalala keetiin hidhamee namni biroo nama
natti hinfakkaatu. Falmeekoo yoomiyyuu sinjaaladha. Fayyaa
naaf tayi, nagayatti. Jaalalleetee Seenaa Yuunivarsitii
Haroomayaa irraa”…] jedha barreeffamichi.
Seenaan barattee eebbifamtus ragaa miseensa OPDO
(woyyaanee) fiddu malee, hinqacaramtu waan jedhamteef hojii
argachuu hindandeenye. Baadiyaa isheetti deebitee akkooshee
wajjiin jiraachuu jalqabde. Akkoonishee seenaa isheefi
Falmataa dhageessee ganamaaf galgala seenaa cinaa
dhaabbattee gorsiti.
Gaafa inni mana hidhaatii bahu lakkooftee seenaan balbala
mana hidhaa maayikalaalwii dhaabbatte. Ijji isaanii
imimmaaniin dukkanaaye. Falmataan akkas bareeddu yeroo
waggaa saddeet xumuree mana hidhaatii bahu, akka bosona
Baaleefi Booranaa guggubatee dhumeera.. Seenaan fi
Falmataan wal arganii halkaniif guyyaa wallaalan
gammachuudhaan.
Ergasii baadiyaa deemanii akka Oromoo duriitti iyyanii
iyyisiisanii cidha nama ajaa’ibu tokko gaggeessan.
Manguddoonni bahanii eebbisan. Ji’a tokko booda DV
Ameerikaa seenaan waggaa tokko dura, ani heerumeera jettee
guutte tokko dhufe. Gaafa isaan baadiyaadhaa barbaadanii
xalayaa itti geessan DV’n baheeraaf. Falmataafi seenaan
tasuma amanuu hindandeenye. Oromiyaa gadi dhiisuun
kaayyoo isaanii ta’uu baatus; Falmataan ammas poolisootaan
hordofamuu eegaleera waan ta’eef, lubbuu isaanii hambisuuf,
miila isaanii gara Ameerikaatti qajeelchan.
Kutaan 5ssoon itti fufa..
@lammiif
BY Asoosama Gaggabaaboo
Share with your friend now:
tgoop.com/lammiif/3600