tgoop.com/laboratoryanalysis93/415
Last Update:
صباح الفلالي💛
يارب تكونوا بخير بيخطر علي بالي دايماً كلمة رقائق الويفر الهشَّة أو كيكة ماما الهشَّة بردوا أو بسكوت نواعم الهشّ وبكون عايزة أعرف يعني إي هشّ الي بنوصف بيها الحاجات دي !
هل اسمها كدة عشان هي ناعمه مثلا ؟! ولا انها سهلة تتكسر !؟ ولا عشان مش قادرة تمسك نفسها مثلا قصاد ضغوطات الحياة زي انها تتغمس في كباية شاي !؟
واكتشفت مؤخراً إنها تعني ده كله فلك أن تتخيل إي الي هيجرالك لو عظم جسمك بقي رقائق ويفر هشًّة ولا بسكوت نواعم الي مبيستحملش ده اي الي هيجرالك !؟
وعشان نفهم إي الي هيحصل يلا بينا نتكلم عن هشاشة العظام ..💛
هيا بنااا .."
الأول كدة خلايا العضم بتاعك مش دايما هي هي لي ؟!
عشان دايما في شوية خلايا بتموت وقصادها في شوية خلايا بتتجدد ودايما بيبقي عندي توازن ما بين الي بيموت والي بيتجدد وبتختلف النسبه علي حسب العمر بتاعك
يعني الأطفال الصغننين محتاجين عضم كتير وعشان كدة بيبقي عندهم الي بيتجدد أكتر من الي بيموت ويفضل كدة لحد ما يكبر ويبقي عنده ٢٠ سنه كدة
وبعد ال٢٠ يبدا التجديد يقل حبه صغيرة فيبقي الي بيموت قد الي بيتجدد عشان يبقي منتظم بقي
ولما يكون فوق ٣٠ سنه بقي تبدا الخلايا تموت أكتر ويبقي الي بيتجدد أقل ..!
قد يتسائل أحدهم وهل ده ثابت في الناس كلها !؟
هقول لأحدهم إن العمليات دي بتفضل ماشية كدة زي الفل طالما بتاكل كويس واكلك منتظم ومنظم حياتك ورياضه صح ولو بدأت تلخبط هتلخبط معاك ونقدر نلخصها في جملة ان قوة عظمك بتعتمد علي الكتلة الي اتكونت وانت شباب والكتله دي عشان تبقي كويسه لازم تبقي بتاكل كويس وتعمل رياضه وحياتك فل الفل يعني
تمام انا عرفت دلوقتي الخلايا واي الي بيجري برضوا اي هي عظام الويفر الي بتتكلمي عنها دي!؟
هشاشة العظام او الي بسميها عظام الويفر دي عبارة عن ان الخلايا الي بتموت شادة حيلها خالص والخلايا الي بتتجدد كسلانه وبالتالي عندي تكسير كتيير خالص خالص فكتلة العظم بتقل وتحسه بقي ليِّن شوية ومش نفس قوته وبتظهر بعد كدة علي هيئة ان العضم ده سهل اوي انه يتكسر او يتعوج مني وممكن يسبب شوية وجع في الضهر كمان وتبقي عرضة انك لو اتحركت حتة حركه صغيرة غلط تتكسر وندخل في دوامة الجبس والالتئام وحوار كبير اوي سيادتك
يبقي دلوقتي نعرف اي الأسباب وازاي اعمل وقاية منه أحسن حتي احنا عارفين ان الوقاية خير من العلاج 💛
تعالو ناخد الأسباب كدة سوا .."
اسباب هشاشة العظام كتير تعالوا نلخصها في شوية نقط صغيرة كدة
ومع أول سبب ونقول ألو😂💛
_اول سبب وأهم سبب هو نقص مستوي الكالسيوم عندك وده بسبب انك مبتاكلش أكل فيه كالسيوم زي البان او خضراوات أو سمك وبالتالي مفيش كالسيوم وبالتالي مفيش عضم كويس عشان الكالسيوم ليه دور كبير خالص في تكوين العضم
_ تاني سبب وهو ان حد يبقي عامل عملية مثلا في جزء من اجزاء الجهاز الهضمي زي المعدة او الامعاء وبالتالي مش هتمتص كالسيوم بكمية كفاية وبالتالي مفيش عضم كويس وانت عرفت لي
_ السبب التالت خاص بالستات ونقوله بصوت واطي خالص عشان محدش يشمت فينا وهو ان الستات بعد سن اليأس بيبقوا أكتر عرضة إنهم يتصابو من الرجاله بس أصلا عادي احنا هنعمل وقاية😌
_ السبب الرابع وهو لو في تاريخ مرضي للعائلة اصلا فممكن يبقي وراثه يعني
_السبب الخامس هو نقص شوية هرمونات جنسية سواء في الستات او الرجاله فبتأثر علي العضم بردوا
_ السبب السادس والمهم عندنا هو الملح الزيادة .. الملح الزايد بيتخلص من الكالسيوم عندي وبالتالي العضم مش هيتكون كويس
_ السبب السابع بيقول ان النحافة الزيادة بردوا بتزود خطر الإصابة بيه عشان بتبقي انسان رفيع خالص فسهل تتكسر من اي وقعه
_وآخر سبب عندي هو شرب المشروبات الغازية بكميات كبيرة عشان بردوا بتتخلص من الكالسيوم !
دي كلها أسبابه فنحاول نتجنبها عشان نعمل وقاية
فالوقاية بتاعتنا هتبقي عبارة عن انك هتهتم بأكلك حلو وكمان تهتم بانك تدخل كالسيوم في أكلك بكمية مناسبة عشان يقدر العضم يتكون حلو زي انك تاكل ألبان وخضراوات وأسماك او عصير برتقال
كمان ناكل فيتامين د عشان يساعد علي امتصاص الكالسيوم بتاعنا ونقدر ناخد فيتامين د من اننا نتعرض لاشعة الشمس مثلا او ناكل سمك او ألبان ومشتقاتها
كمان لازم نعمل رياضة بحيث يبقي جسمنا صحي وتقل عرضة إصابتنا بالهشاشه 💛
وفي النهاية اكيد كلنا بنحب ناكل الحاجات الهشَّة عشان طريِّه كدة وجميلة بس خد بالك ... اوعي عضمك يبقي هشّ عشان ساعتها مش هتبقي حاجه جميلة خالص
# تجميعة معلومات من يوتيوب
# آلاء مسعد لاشين 💛
BY معلومات طبية💊(مختبرية)
Share with your friend now:
tgoop.com/laboratoryanalysis93/415