tgoop.com/kararalmohmdawy/609
Last Update:
شرفي ترابچ برجليه وقبليهن يسامراء
النزل گاعج علي الهادي وأمه فاطمة الزهراء
............
شمايل من رسول الله وطيب ام الحسن عطره
يگاع العكسر تعرفين اجالج مو بطوع أمره
أسألي ليا سبب هالناس آذو عاشر العترة
منفي من بلد لآخر هاي أجزاة ابو الزهرة
احفظي اسمه واحذفي الناس كون ازدحمت الاسماء
شرفي ترابچ برجليه وقبليهن يسامراء
النزل گاعج علي الهادي وأمه فاطمة الزهراء
..........
حين استقدمه ما بر شعنده وياه المتوكل
بخان يعوفه ثلث ايام وقصده بهاي چان الذل
الصعاليك اسمه هذا الخان بيه وين اللئيم يحل
چبيرة بحق رسول الله بهالخان ابنه من ينزل
من هذا الجره وشفتيه گومي ودنگي استحياء
شرفي ترابچ برجليه وقبليهن يسامراء
النزل گاعج علي الهادي وأمه فاطمة الزهراء
...........
حكيمة اخته الاجت وياه منفي وهيه منفيه
وأتأست بعمتهـــا الخذاها الشام مسبيه
احفظيها يسامراء تره بنت النبي هيه
طف لا بالج اصيرين وتسبين انقى ذرية
تره اليسبون أخذهم عار وزينب ضلت الحوراء
شرفي ترابچ برجليه وقبليهن يسامراء
النزل گاعج علي الهادي وأمه فاطمة الزهراء
..........
شماله لونج اتغير وغيم البالسماء أصفر
وأنّكبت بني هاشم وي ثالث رجب من مر
يسامره مشه الهادي راح المسك والعنبر
أمزّگ الثوب حاسر راس هذا ابنه الحسن يظهر
انصبي واعية فگده بكل ما عندچ من أنحاء
شرفي ترابچ برجليه وقبليهن يسامراء
النزل گاعج علي الهادي وأمه فاطمة الزهراء
.......
كرار المحمداوي
BY الشاعر الحسيني كرار المحمداوي
Share with your friend now:
tgoop.com/kararalmohmdawy/609