tgoop.com/jbrjbrjbr/3916
Last Update:
بالحسره رديت . الگيت اظلم البيت
بالگبر نام الضوة ودنياي ظلمه.
مني راحت فاطمة گلبي شيسلمه.
ـــــــــــــــــــــــــــــــــــــــــــــــــــــــ١
ظلوا اولادي يتامه راحت امهم
من يسئلوني عليهه بعبره أگلهم
بليله ظلمه ادفنت أمكم وابچي يمهم
شلون اصبرهم اذا راح اليلمهم
لسه علباب. اثار الدمه
لسه علباب. قصت فاطمه
لسه علباب. ظلوع مهشمه
من ام الحسين. منكسر ظلعين
وظهري مكسور وبعد محد يحزمه.
مني راحت فاطمة گلبي شيسلمه.
ــــــــــــــــــــــــــــــــــــــــــــــــ٢
بيمن ابچي وبالگبر طميت العيون
من بعد أم الحسن ماعندي كل عون
من بعدهه راح اظل ابداري مسجون
الناس عافتني ومشت تسجد لفرعون.
وانه هارون. وصفني الوحي
وانه هارون. منزلتي الوصي
وانه هارون. من بعد النبي
داري محروگ. حگي مبيوگ.
انقلاب اعلينه صار واقسه هجمه
مني راحت فاطمة گلبي شيسلمه.
ــــــــــــــــــــــــــــــــــــــــــــــــــــــ٣
ربنه بالقرآن وصه الناس بينه
ليش من مات النبي هجموا علينه
احنه ما أذينه واحد واعتدينه
ليش كتلوا فاطمه وماتت حزينه.
ماتت ومات. حلم اهل الارض
ماتت ومات. گلبي وينقبض.
ماتت ومات. محسن والنبض
محسن يروح. وزينب تنوح
.
المحسن استشهد كتب اعلباب دمه.
مني راحت فاطمة گلبي شيسلمه.
ـــــــــــــــــــــــــــــــــــــــــــــــــــــــــ٤
شفت بسمار بصدرهه والنفس راح
صرت كلساع انذبح من غير ذباح
انگطت اوتار الگلب ماضلي سباح
ابوصط لحد الزهره گلبي يابشر طاح.
وياهه ياناس . چم موته متت
وياهه ياناس . حيل اتالمت
وياهه ياناس . انه اتصوبت.
جرحي ماطاب. يشهد الباب
هاي صدمة الما وراهه بعد صدمه.
مني راحت فاطمة گلبي شيسلمه.
ــــــــــــــــــــــــــــــــــــــــــــــــ٥
غسلتهه وشفت بعيوني ظلعهه
كاسره الباب واحس بيه وجعهه
الظالم بخدهه أثر چفه طبعهه
فاطمة المظلومة من حگهه منعهه
صوط الانذال. اثاره بقت.
صوط الانذال. منه اتلوعت
صوط الانذال. منه ماغفت.
بگد الاكوان. شافت احزان
.
بيت اهل بيت النبي محد يرحمه.
مني راحت فاطمة گلبي شيسلمه.
ــــــــــــــــــــــــــــــــــــــــــــــــــــــــــــ
حيدر موسى الرميثي.
BY حيدرموسى الرميثي
Share with your friend now:
tgoop.com/jbrjbrjbr/3916