tgoop.com/jbrjbrjbr/3914
Last Update:
وياچ چانت حلوه كل أيامنه.
متي وبگبرچ دفنه أحلامنه
ابلا طعم تبقى الحيات.
ابموتت الأم كلشي مات
يمه يمه.
ـــــــــــــــــــــــــــــــــــــــــــــــــــــ١
چنتي بالبيت احله زهره. توزعلنه اطيب عطر
ليش عفتي الدار وحشه. ورحتي نمتي بالگبر.
ليش ماضليتي يمنه. وندعي ضلعچ ينجبر.
بگبرچ ارتاحيتي لو ضل. ألم بسمار الصدر
ازغار مازلنه ونريدچ يمنه.
وسفه منچ هالوكت يحرمنه
تموت كل الكائنات.
ابموتت الأم كلشي مات
يمه يمه.
ـــــــــــــــــــــــــــــــــــــــــــــــــــــــ٢
فرشت السجادة زينب. الچ وتگلچ تعاي
يالزچية أگعدي صلي. توضي يمه عندي ماي.
ماتهنيتي بشبابچ . الموت اجاج اشعنده جاي
چان تانه لمن نكبر. ومايجي بلحظه هاي.
متي وايدچ عالظلع لازمته
گلتي أروح المحسني الفارگته
بگبره محسن وحده بات.
ابموتت الأم كلشي مات
يمه يمه.
ــــــــــــــــــــــــــــــــــــــــــــــــ٣
الله لاينطي الدفعهه. بابچ وصاب الظلع.
انشلت أيده الصطر عينچ. چفه بالخد منطبع.
صياط قنفذ عذبتنه. وصوت نوحچ ينسمع.
روحچ المسبية ذابت. مثل ماذاب الشمع.
دارچ البيهه الوحي حرگوهه
وروحچ الطيبه العده أذوهه
بكل وكت تبچي الصلات
ابموتت الأم كلشي مات
يمه يمه.
ـــــــــــــــــــــــــــــــــــــــــــــــــــــــــــ٤
أمنه يامحله صباحچ. لوگعدتي من الصبح
والله صوتچ من نسمعه بلسم ايداوي الجرح
يا صباح الخير ماتت. بعد عينچ تنذبح.
ابلايه أمنه الدنيه ظلمه. طعم مابيها وملح.
الگلب أمنه وجزء من أرواحنه
أمنه گاع وتحتضن سباحنه.
تجتمع بيهه الصفات
ابموتت الأم كلشي مات
يمه يمه.
ـــــــــــــــــــــــــــــــــــــــــــــــــــــــــ٥
بلايه زهره العيشه مره. ظلع زهرتنه انكسر.
من بعد عين الحنينه. عيونه اتصب كالمطر.
انصبغ ثوب الكعبة أسود. وأسود ايصير الحجر
أمنه ريحت جنة الله. أفراگهه يكسر ظهر.
والتموت امه تعيش،أحزانه
الورد يذبل من تموت أغصانه
تبقى بس الذكريات
ابموتت الأم كلشي مات
يمه يمه.
ــــــــــــــــــــــــــــــــــــــــــــــــــــ٦
الحسن ضل يبچي مضيفه. وعلى گبرچ ضل يون.
وناح الحسين بغيابچ . الچ كل لحظه يحن.
زينب اخلافچ غريبه. تبچي وتغرگ الجفن.
الخيمة طاحت من رحلتي. وصارت الدنيه سجن.
علي مكسور الظهر بمصابه
عجبه داحي الباب حرگوا بابه
والعيون الباكيات.
ابموتت الأم كلشي مات
يمه يمه.
ـــــــــــــــــــــــــــــــــــــــــــــــــــ
حيدر موسى الرميثي.
BY حيدرموسى الرميثي
Share with your friend now:
tgoop.com/jbrjbrjbr/3914