tgoop.com/jbrjbrjbr/3901
Last Update:
يا أبو الكل الخدم.
بذكرك ايطيب الألم
ياحبيبي ياحسين.
ــــــــــــــــــــــــــــــــــــــــ١
أيتام احنه وانته أبونه. خيمه النه ياحسين.
يبقى عاشورك يلمنه. شما تفرقنه السنين.
لولا دمك يابو الأكبر الناس تبقى ابلايه دين.
الماي مات بعطش گلبك وانته احيت المعين.
ياسلام ايصب دمه.
يابداية وخاتمة.
ياشفيع المذنبين
ياحبيبي ياحسين
ـــــــــــــــــــــــــــــــــــــــــــــ٢
انته شيخ الدنيه كلها. وابد ماتطرد أحد.
تحتوي الناس بحنانك. يا آمان الكل بلد.
ماتفرق بين ابيض. بين أسود لا أبد
مسك جونك لسه عطره ايداوي الخشوم وبعد.
يوزع الحرية ظل.
وعطر من جون البطل.
صبر واخلاص وحنين.
ياحبيبي ياحسين
ــــــــــــــــــــــــــــــــــــــــــــــــــ٣
خاف ننسه خاف نخطأ. خاف يغرينه الذنب.
ارجوك لا تزعل علينه. أحنه غيرك مانحب.
لحظه لو ينساك عقلي. ينشد عليك الگلب.
ولو عقلي أنته خذته. وصار ملكك ينحسب.
اني ملكك مو ألي.
تسوه روحي وكل هلي
بس الك يحله الونين.
ياحبيبي ياحسين.
ـــــــــــــــــــــــــــــــــــــــــــــ٤
السفن بس علماي تمشي. السفن تغرگ بالخطر.
بس سفينة ابو اليمه . تمشي بالبر والبحر.
علصراط بفخر تعبر. وتنجه من وادي سقر.
المشه بدرب حسين ينجه. حتى لوذنبه كبر.
نلطم اعليك الصدر.
خل جرحنه ينجبر.
يا أبو الرحمه الحنين.
ياحبيبي ياحسين
ـــــــــــــــــــــــــــــــــــــــــــ٥
بيك اشوفن بيك اسمع. ياطبيبي انته الأمل
سيدي من غير حبك اني ماعندي عمل
چنت مافاهم حياتي. وعقلي بالخدمة اكتمل.
بگبري تحضرني اريدك. ياحسين وبالأجل.
گلبي من مايك شرب.
وابد غيرك ما رغب.
يا أمير العاشقين.
ياحبيبي ياحسين.
ـــــــــــــــــــــــــــــــــــــــــــ
حيدر موسى الرميثي
BY حيدرموسى الرميثي
Share with your friend now:
tgoop.com/jbrjbrjbr/3901