tgoop.com/jawadkr/9
Last Update:
ليش مانسمع بعد كلماتچ
هودن فوك النحر وناتج
الله يعلم بالجره. .من شبگتي منحره
يارقيه. ............يارقيه
____________________________
فوك رأس حسين اشوفج عمه بس بياوضع
ثغرج ونحره تلاگن بين عبرات ودمع
ساعه لن صوت المناحه هود وماينسمع
وصرتي باحضان المنايا وعمرچ الغض منصرع
اشفتي من حاله وتغير حالچ
خلت طيوف الاجل تبرالچ
ويامنيه مقدره... من شبگتي منحره
يارقيه.............يارقيه
----------------------------------------------
الروعچ شوفه جبينه وشعمل بيه الحجر
عمه لو رمح الشماته التارك بنحره اثر
شفتي ثغره الچان زمزم يروي چم طبره انطبر
عمه لوطاحت عيونچ فوگ اثر حز النحر
نياط گلبچ گطعنها رسومه
لوشفاه الذابله المحرومه
المن ضماه مفطره..من شبگتي منحره
يارقيه............يارقيه
---------------------------------------------
هدم اركانچ سكوته من بديتي بشكوتچ
ومالگيتي اچفوف اديه البيها يمسح دمعتچ
بين ذرعانه يضمچ يارقيه معودچ
صدره ضل بالغاضريه وين طاحت دمعتچ
الچان باللثمات يسگي سنينچ
شفتي شيبه مخضبينه بعينچ
من دماه الطاهره..من شبگتي منحره
يارقيه...............يارقيه
-----------------------------------------------------
الله يعلم يارقيه شلون چانت حالته
مثل ونتچ ياحبيبة گلبه طلعت ونته
بعيني شفت دموعه نزلت مودمع دم دمعته
وكلمتچ وينك ييابه يارقيه اذته
روحه ضلت تنتحب وي روحچ
تاركه جروحه وتداوي اجروحچ
يدري بيچ امرمره..من شبگتي منحره
يارقيه...........يارقيه
----------------------------------------------------
يادمع يگدر يواسي هالامر ويوصفه
بس خمس وردات عمرچ ولاجل يمچ لفه
عمه ياگلب البتول المملي طيبه وعاطفه
من بعد عينچ رقيه عمه عالدنيا العفه
ياعزيزه گلب اخوي الضامي
زدتي نوحي ومحنتي والامي
وصرت بيچ امحيره..من شبگتي منحره
يارقيه............يارقيه
----------------------------------------------
الليله اخرليله يمچ وي فجرها راحله
عنچ بدمع المحاجر وگصد الطف كربله
انتي ضلي بالخرابه واني ارد بالعايله
لگبر ابوچ وراح اخبره حالتچ يمدلله
راح اخبره عن زراگ متونچ
وشلون من بعده العده يضربونچ
وانتي طفله ميسره...من شبگتي منحره
يارقيه..........يارقيه
جواد كاظم الگرعاوي
BY جواد كاظم الگرعاوي
Share with your friend now:
tgoop.com/jawadkr/9