tgoop.com/jawadkr/814
Last Update:
مودع الله يالمشيت بهالمسيه
من بعد عينك صفيت اصفگ بديه
ريت لاطال العمر.....
من بعد هذا الامر....
تعمه عيني.....تعمه عيني
------------------------------------------
مودع الله يالخذت عمري وحياتي
الليله ياحيدر تشضت امنياتي
وين رايح بويه ياصومي وصلاتي
ريت وي موتك دنت ساعة مماتي
ريت اموتن ياعلي ولاابقه بعدك
ريت اموت وينحفر لحدي وي لحدك
واسكن وياك الگبر...
من بعد هذا الامر....
تعمه عيني....تعمه عيني
-------------------------------------------
مودع الله يالخذت كل روحي مني
من شفت نعشك يغالي خاب ضني
من يبارحني ويناشد يابه عني
وياهو بغايبك يصبرني اعله وني
راح اعيشن وحدي باحزاني وانيني
حتى لو باحلامي اتامل تجيني
الله ينطيني الصبر....
من بعد هذا الامر....
تعمه عيني....تعمه عيني
---------------------------------------
الله يالغالي يساعدني بمصابك
حايره بياروح اصد لوعه عذابك
بويه ضلت ذكرى منك بس ثيابك
بروحي اشمهن وانثر دموعي اعله بابك
راح انطرك وادري ماممكن ترد
راح انطرك واحسب ليالي واعد
بدمعي اساهر للفجر...
من بعد هذا الامر......
تعمه عيني....تعمه عيني
------------------------------------------
مودع الله وبعد ماينفع كلامي
ولايردك ياعلي لطمي عله هامي
بويه اريدك تاخذ اشواگي وهيامي
وللزچيه ياعلي اتوصل سلامي
وصل الها ياعلي ادموع المصيبه
وگلها زينب من بعد عينچ غريبه
قاست سنين الهجر....
من بعد هذا الامر.....
تعمه عيني....تعمه عيني
------------------------------------------
مودع الله ياعلي ياحامي جارك
سنين ارض النجف ضلت بنتظارك
وضلت خلافك يحيدر وحشه دارك
مظلمه وحيطانها تعاتب فقارك
ليش ياسيف الشدايد هالرزيه
شلون ابن ملجم طبر حامي الحميه
بيش تبرز للكفر.....
من بعد هذا الامر....
.تعمه عيني....تعمه عيني
-----------------------------------------
مودع الله تنادي مفجوعه اليتامه
من بعد عينك فلا نلگه السلامه
ياعلي ننتظرك بيوم القيامه
نشكي للباري يحيدر هالظلامه
ياالهي اهل الحقد جارت علينه
وضيعت ياربنه حيدرنه من ادينه
يتمونه اهل الغدر....
من بعد هذا الامر.....
تعمه عيني....تعمه عيني
-----------------------------------------
راح اودعك ياعلي وابچي عله حالي
واستعد يابويه لهوال الليالي
يخطف احبابي الزمن غالي عله غالي
ويترك اشكال الجراحات بخيالي
بالحسن يفجعني ياعظم الرزيه
ويكسر جناحي بضحايا الغاضريه
وامشي بدروب اليسر
من بعد هذا الامر.....
تعمه عيني.....تعمه عيني
(جواد كاظم الگرعاوي)
BY جواد كاظم الگرعاوي
Share with your friend now:
tgoop.com/jawadkr/814