tgoop.com/jawadkr/8
Last Update:
قصيده بحق اصحاب الحسين عليه السلام....
تبعناك..تبعناك..
بعزم نمشي اعله ممشاك
نريد الخاتمه وياك..
حسيناه...حسيناه..
------------------------------------
العشگ يحدينا يالغالي..تبعناك وتعنينه
اعله ريحة جدك الهادي..ركض جابتنه رجلينه
عطاشه وجينه نتوسل....بحر جودك يروينا
عرفنه الغانمه بدربك..على الجنه يودينا
هويناك..هويناك
بالروح اشتريناك
نريد الخاتمه وياك
حسيناه....حسيناه
-------------------------------------
حبيب وشوذب وعابس..زهير ومسلم ونافع
بوهب مرسول ابن مريم..اجينه الكربله انسارع
موبس كلمة هالبيعه....ولكن بالدمه نبايع
لعد اخر نفس بينه...نضل عن شخصك اندافع
عشگناك...عشگناك
يمن نهلك بلياك
نريد الخاتمه وياك
حسيناه....حسيناه
-----------------------------------------
نعوفك لاتضن ساعه...ونعيش الدنيا من دونك
نروح وكل اهالينه..فدوه لنظره اعيونك
عليك اهل الغدر دارت..تبايعهم يريدونك
مازال النفس بينه...شحدهم لو يگربونك
فديناك فديناك
من يوم التقيناك
نريد الخاتمه وياك...
حسيناه...حسيناه
-----------------------------------------
شنگول لامك الزهره..لون تسألنه بالمحشر
وحيد وماله كل ناصر..تركتو ليش ابو الاكبر
عليها بياوجه نقبل...وبياكلمه نتعذر
لذلك جينه بالدمعه..بأمل تقبلنه مو اكثر
گصدناك..گصدناك
بس روح اعنيناك
نريد الخاتمه وياك..
حسيناه..حسيناه
-----------------------------------------
سفينه لكل نجاة انت...وملاذ لكل گلب حاير
تجارتنه الي ماتخسر...چذب وي غيرك انتاجر
اجيناك بمهج نسعي..ونريدك بالحشر باچر
.يم جدك تزكينا..وعلينه اتوجه الناظر
وعيناك... وعيناك
شفيع المذنب اهناك
نريد الخاتمه وياك
حسيناه......حسيناه
-------------------------------------------
يربان السفينه ابحر...عليك بامك البضعه
نريد ابحضرتك نحرم...نريد بجنتك نسعه
تركنه الدنيا هالساعه...بطلاگ ومابعد رجعه
واجينه لموتك بهمه...نريد العزه والرفعه
محياك... محياك
الفتح غازل محياك
نريد الخاتمه وياك
حسيناه....حسيناه....
...جواد كاظم الگرعاوي..
BY جواد كاظم الگرعاوي
Share with your friend now:
tgoop.com/jawadkr/8