tgoop.com/jawadkr/7
Last Update:
يتيمه...وحرگو الخيمه عليها
يتيمه...وضلت اتشاگف بديها
لامحامي ايحامي عنها
من السياط ازرگ متنها..يتيمه
---------------------------------------
عگب ماطاح العميد اعله الوطيه
وشبت النار بخيمها الهاشميه
فرت اطفال وحرم بالغاضريه
بس يتيمه ضلت بسوح المنيه
رقيه...ركضت ادور اعله ابوها
رقيه...والعساكر من لگوها
مارعوها الزغر سنها
من السياط ازرگ متنها...يتيمه
-------------------------------------
ركضت وخيل العده تبعت اثرها
حوطتها وضيعت منها مفرها
ظالم بچفه عله الوجنه سطرها
وظالم بچعب الرمح يطعن ظهرها
يظالم...نادته ارحم دموعي
يظالم...سوطك اتلوه ابظلوعي
انشلت ايمينك عسنها
من السياط ازرگ متنها...يتيمه
-----------------------------------------
حافيه وفوگ الرمل تتچوه بالحر
مره تركض مره بالموته اتعثر
تنادي وينك بويه شمر بسوطه يفتر
ورم امتوني وضلع مني تكسر
هظيمه...خايفه وشافت وليها
هظيمه...والعدو ايدور عليها
ركضت عليه ابحزنها
من السياط ازرگ متنها...
---------------------------------
ضمني بويه اتگله خل اگطع ونيني
خل أمن لحضه وحده وتغفه عيني
من ابچي يسمع صوتي شمر ويعتنيني
ابد مايرحمني تعلم من يجيني
يغالي...خل الوذ واخفي روحي
يغالي...وغطي بجروحك جروحي
جروحك الينزف طعنها
من السياط ازرگ متنها...يتيمه
-----------------------------------------
ليش ساكت بويه ياحلو المحاچي
احچي وي روحي يغالي المن احاچي
اتريد اصدگ ماتهزك هالبواچي
بويه اخبرك سلبو حتى التراجي
غريبه...ساكت ومترد عليه
غريبه..العزيزه اني رقيه
المادمع يمك جفنها
من السياط ازرگ متنها...يتيمه
-----------------------------------------
شلون اعيش وماتشوفك ساعه عيني
وانت بلسم روحي واشواگي وحنيني
هواي منا للخرابه الا تجيني
ريتك اتعجل يبويه وتعتنيني
سبيه...راح اروحن وي حميده
سبيه...واندفن عنك بعيده
وعمتي اترد الوطنها
من السياط ازرگ متنها....يتيمه
جواد كاظم الگرعاوي
BY جواد كاظم الگرعاوي
Share with your friend now:
tgoop.com/jawadkr/7