tgoop.com/jawadkr/6735
Last Update:
وداع...ليل الهظم بعدك يجن
وداع...والدمعه مذبوحه بجفن
وداع...نادت طوامير السجن
وداع....... ...وداع
---------------------------------------
باخر ترانيم السحر...سجدة وداع وي القهر...ياموسى بيها ترفع الچفوف
چن سجدتك قبله ونحر...ترسمها لمسات القدر...بس بأنامل تشبه السيوف
اخر وداع وي النفس...غربه وتبينها الشمس...غربه وكأنها غربة الطفوف
مصباح عاشر جمعتك...عيون المنايا اتعنتك...من كل كتر تبرالك الحتوف
وحيد....ياجامع اسرار العلل
وحيد.....بين الغدر بين الجهل
وحيد.....بالدمعه تربي عله الاهل
وداع.......وداع
----------------------------------------
مستقبل الموت بعزم...والوقعه ثغرك مبتسم...ثغرك عجيبه مورد الكتاب
مابين ثغرك والچبد...شسوت سچاچين الحقد...مانلگه بس عد روحك الجواب
سم التوسد مهجتك...ذبل محاسن وجنتك...زود الم روحك على العذاب
مستصحب وياه الأمل...بس مايتم الا بأجل...ساعتها يفتح من فرجها باب
يموت...وي موتتك طاري الصبر
يموت..بوجه القناديل الفجر
يموت...ويودع سنينه العمر
وداع......وداع
------------------------------------------
من طالتك چف الرده...طر الفجر مابي نده....وجه الصبح مظلم عله العباد
اوراق الشجر تجري الدمع...صوت البلابل ينسمع....ينادي بحزن حي على الحداد
مايترس العين الضوه..والريه خانگها الهوه...السبعه بمداها اهتزت الشداد
مد البحر اصبح جزر..للنسمه خاطر منكسر...بيض النوارس لبست السواد
عليك.....صارت تون ارض وسمه
عليك....املاك العرش متزاحمه
عليك....بالونه نادت فاطمه
وداع........وداع
-------------------------------------------
بچفوفك قيود الظلم...بصدرك مظالم تنكظم...والكاظمين الغيظ سرها بيك
حلمك كسر طود الحلم...بس الله يملك هالعلم...ويدري شكثر من حلمه مَن عليك
العفوا عله وجهك منرسم...حتى بمماتك مبتسم...خد الورد بدموعه يرتجيك...
لليگصدك تبدي بنعم...چي لنك انت ابن الكرم...اسباب المنيه بينت بديك
بديك....بانت حقيقه علتك
بديك...تحمل حوائج شيعتك
بديك...يوم ارفعتها ونادتك
وداع.......وداع
-------------------------------------------
چفوف الملائك حملتك...صلت جمع بجنازتك...طافت عليك بونه وبنحيب
سارالنعش صوب الجسر..ويشيعك موكب يسر....يتقدم الموكب نحر خضيب
بيه العقيله ام الخدر...تحديها زجرات الشمر....موكب غريب يشيع بغريب
جنازه ويساره بلا وطن...بالكاظميه اتجمعن..بس الشماته ومايصح حبيب
غريب..يالكاظم وصوت المحب
غريب..بس همسه منك يقترب
غريب...بدمعه عله نعشك تنكتب
وداع...........وداع
-----------------------------------------
الماحضروا بدفنك امس...ولي يندبونك همس...ياسيدي بعينك صرت تشوف
من كل كتر گصدوا زحف...النعشك الف يتبع الف...مو اربعه اتشيل النعش الوف
ياسابع انوار الحجج....زوارك مرخصه المهج...ماتلگي بگلوب الغياره خوف
ابابك دمعها اتسبله...وتهوى بخشوع اتقبله...تنادي بانين ولهفه من تطوف
سلام....ياموسى الك وي العهد
سلام....لامانعوفك للأبد
سلام....وهالكلمه ماتسمع بعد
وداع..........وداع
جواد كاظم الگرعاوي
BY جواد كاظم الگرعاوي
Share with your friend now:
tgoop.com/jawadkr/6735