tgoop.com/jawadkr/6
Last Update:
گومي يم جاسم الليله وشعلي الشموع
خل نواسي ام الشهيد بفيض الدموع
للمگابر زفته....مثل جاسم حنته... بفيض الدموع
--------------------------------------
فاطمه بكل حزني جيتچ يلي بالطف شاهده
گومي نحضر هالمسيه نواسي حره اوالده
مثلچ اتخضب ابنها ومثلي ام وفاگده
من الحزن ذايب گلبه خل نروح نساعده
خل نواسي ام الشهيد الماتاخر
عن نداء المرجعيه ولا تعذر
والنعم من ربته....مثل جاسم حنته... بفيض الدموع
---------------------------------------
اخذي وياچ الخضاب واخذي يم جاسم ورد
خل نحني اچفوف ابنها منها راح ومايرد
خل نطش الورد كله فوگ راس ابن الحشد
شيعتي اصحاب العقيده الردو جيوش الحقد
بيهم بعمر الورد رخص وريده
بيهم خضاب العرس مالامس ايده
ولاتهنه بدنيته....مثل جاسم حنته.. بفيض الدموع
-----------------------------------------
خل نواسي ام الشباب ارد اشعل بأيدي الشمع
وي دمعها اليوم اهلن عالنعش دم ودمع
امس باحزان المصيبه تنحب لكسرالضلع
اليوم اردلها الخدامه بنوح ابد ماينگطع
ارد انوحن يم ابنها بدمعة العين
بالحزن خلص عمرها وخدمه حسين
وماتعوف زيارته....مثل جاسم حنته.. بفيض الدموع
-----------------------------------------
خل نواسيها بحزنها والده وضحت ابن
بكل نفس تشهگ عبيره يمرن رسومه وتحن
خل نون وي الحزينه بكثر ماچانت تون
من تمر ذكرانه بيها وتلبس هدوم الحزن
شماتميل الدنيا ويعاند زماني
ابد ماانسه الذكرني ومانساني
بكسري اروح لمحنته...مثل جاسم حنته.. بفيض الدموع
--------------------------------------
خل نواسي ام الشباب المالبس ثوب العرس
الچان يحضربالمواكب يخدم الزوار امس
اليوم من اجل الأمامه ضحه يارمله النفس
مثل جسام بصموده علم العالم درس
من سمع. صوت المنادي قرر يروح
ولجل دين الله ورسوله ضحه بالروح
الدنيا ابد ماغرته... مثل جاسم حنته .. بفيض الدموع
----------------------------------------
نشوف اطفال وثواكل يمها يارمله شكثر
غرب الموت بأملها واليتم اصبح يسر
شكم حميده شكم سكينه العاشت بحر الجمر
شكم رقيه المات ابوها والدهر صار الشمر
شكم يتيم من الهظم صاح الضليمه
شكم رقيه بهلوكت صارت يتيمه
دامي ابوها شافته...مثل جاسم حنته.. بفيض الدموع
جواد كاظم الگرعاوي
BY جواد كاظم الگرعاوي
Share with your friend now:
tgoop.com/jawadkr/6