tgoop.com/jawadkr/51
Last Update:
وحدي عفتيني ومشيتي.... يالمشيتي ابغير اوانچ
لاتروت عيني منچ...لاتهنيت بحنانچ
لحضه اوداعچ عمتني....يمه يمه
-----------------------------------------
عالمصايب فتحت..عيني وبعينچ شفت..نظره مهظومه ودمع يجري اعله خدچ
من كثر هظمچ نحت..ومنچ اني اتعلمت...تبقه عيني مساهره وغفه اعله ونچ
اشرك بهمچ ردت...لچن وازاني الوكت..ودهري حالف من زغر يحرمني منچ
كلشي اني اتوقعت..بس ابد ماحسبت..18 عمرچ ييمه وانه افگدچ
وابقه من بعدچ غريبه...اصفگ ايمني بشمالي
وانظر لدارچ خليه...ماخطر يوم اعله بالي
الدنيا بغيابچ ولتني...يمه يمه
لحضة اوداعچ عمتني..يمه يمه
------------------------------------------
بعيني نعشچ يبتعد..وحادي اضعونچ يجد...واني اصيح وبس صدى يرجع عليه
افتح الباب واسد...مره اركض مره ارد...حايره ومذهوله من عظم الرزيه
ايست مات الورد...واندفن وسط اللحد..من رجع حيدر علي بدونچ اليه
جرحي اضمدنه واشد...وللمصايب استعد...ياگلب اصبر وراك الغاضريه
ادخل الغرفة صلاتچ...واسمع السجاده تنعي
يمه چن صوتچ اسمعه...بونه ينده اه يضلعي
هالمصايب صوبتني...يمه يمه
لحضة وداعچ عمتني..يمه يمه
--------------------------------------
النسمه بغيابچ تمر..بريتي مثل الجمر..خلاف عينچ صرت مكسوره وحزينه
بصبري جبرت الكسر...وانگطع حبل الصبر...ياصبر ينفع بعد رحتي من ادينه
احلم بچفچ يمر...ينشف ادموع الزغر...وفز مرعوبه على حسين وانينه
چن دمعته تعتذر..انسي زينب هالامر...امنه راحت يالعقيله وماتجينه
بدمعي وي بابچ اسولف...ليش ياباب النوايب
ماحميت امي الزچيه...يوم دفعوك الاجانب
بياذنب من يتمتني...يمه يمه
لحضة اوداعچ عمتني..يمه يمه
-----------------------------------------
چنتي خيمه وچنتي ضل...بيچ افيي واستضل...الامان بخيمتچ ماصح مثيله
هسه بس ليلي يچل...اون ونات الابل...وبچي بچي النوگ المضيع فصيله
دهري مني مايمل...هو يعگد واني احل....يچتف بأيدي على الناگه الهزيله
بعيني بس دمعي يهل...وانهظم من انسأل....يالتركتي بروحي الهموم الثجيله
يالاخذتي كل شي مني...ومااخذتيني وي ضعنچ
اعلم يجرحچ عتابي...واعتذر ياييمه منچ
الونه ابد مافارگتني...يمه يمه
لحضة وداعچ عمتني..يمه يمه
----------------------------------------
عادة اليفگد محب....تخنگه نسمات العذب..بس ونينه يهود الامه وجراحه
ينسه لو گالو چذب...مايخليه الگلب..تنزف اجروحه حزن ليله وصباحه
يالسكنتي بالترب...ذكرچ بروحي يهب...بكل وكت ويهيج ابگلبي النياحه
موتي مني يقترب...واحس روحي تنسلب...الموت ارحملي ييمه اني بصراحه
شكد تمنيت وي نعشچ...ينحمل يالزهره نعشي
ولاتخليني الليالي....محيره ومسبيه امشي
وينثني السوط اعله متني...يمه يمه
لحضة وداعچ عمتني..يمه يمه
------------------------------------------
صارت احلامي وهم...بكربله متانيني هم....هم ييمه ماخطر مره اعله بالي
ازغر همومي خيم...تحترك وتضل حرم...محيره ابين العدو من غير والي
وأكبر ارجروحي سهم...بعين كافل تجري دم..ورمح شايل راس اخوي حسين عالي
وبعد ياخذني الجدم...لقصر ابن عبد الصنم...وانسبي واني الي ماشافو خيالي
ريت اموت ولا اشوفن....شامت تصد عينه اليه
ولااشوفن روس اخوتي...بين ادين ابن الدعيه
نضرة الشامت سبتني...يمه يمه
لحضة وداعچ عمتني..يمه يمه
.جواد كاظم الگرعاوي
BY جواد كاظم الگرعاوي
Share with your friend now:
tgoop.com/jawadkr/51