tgoop.com/jawadkr/5
Last Update:
بروحتك گلبي انكسر...
طاوعت عيني السهر....
مارحم بيه الدهر....
يبني يحسين...يبني يحسين
------------------------
بلحضه وداعك..ودعت روحي وحياتي وياك يالغالي
شودعت عندي.. بس دموع وهم مصابي وحزني يبرالي
مانفع صبري..من شفت ضعنك سره وجد خابت امالي
نضره عيونك..وكلمتك رايح ييمه ضلت ابالي
يبني يوم الي رحت...
چن الف موته متت...
من نويت علسفر...
مارحم بيه الدهر...
يبني يحسين..يبني يحسين
-----------------------
بدمعه الفاگد..عيني تنظر عالرواحل تبعد عليه
بس صدى صوتي..ينادي يمه وداعه الله راشده النيه
صوت البگلبي.. يگلي لحسين واخوته مابعد جيه
صرت اتابعكم.. وانثر الماي بأمل بلكت ترد ليه
امشي واتعثر صرت....
ردت منك تلتفت....
من بعدت علنظر....
مارحم بيه الدهر....
يبني يحسين..يبني يحسين
----------------------
ضلت عيوني..عالدرب تربي وتراقب وانطر اخبارك
بونتي ونوحي..وحسرتي بروحي العليله وبالگلب نارك
خوفي وامالي.. يذبح بروحي الحنين واعتني الدارك
عيني بس تدمع..لوسأل عنك ينور العين خطارك
احسب ايام وأعد....
يمته يالغايب ترد...
وانت مامنك خبر...
مارحم بيه الدهر....
يبني يحسين..يبني يحسين
------------------------
دارك افرشها..بكل صباح وي العليله ونگعد نتاني
ماتجي يبني..بس يجيني الليل يحمل همي واحزاني
فاطمه تناشد..تگلي معقوله يجده الوالي ينساني
بدمعي اصبرها.. وسهر الليل بأمل يطلع صبح ثاني
صرت محتاره شأرد...
يلي طولت البعد...
شهر ضل يتبع شهر...
مارحم بيه الدهر....
يبني يحسين..يبني يحسين
-----------------------
تيتمت يبني..من سمعت الناعي ينعه وبسمك ينادي
گتله خبرني..عن عزيز الزهره روحي ومهجه الهادي
گلي اولادج.. بكربلا ضلو ضحايا وسكنوا الوادي
گتله يالناعي..عن ابو الاكبر سألتك مو عن اولادي
گلي يم الاربعه....
حسين جثته مگطعه...
وعالنهر طاح الگمر....
مارحم بيه الدهر....
يبني يحسين..يبني يحسين
---------------------
يمه يايمه..من سهرها ودم دمعها عميت عيوني
يمه يايمه..لياحزن يبن الزجيه لوحدي عفتوني
حسين يايمه..ردتك بساعه مماتي وي اليشيعوني
حسين يايمه.. عگب عينك ياحبيبي خابت ضنوني
راح اموت بحسرتي...
وحين تگرب ساعتي...
لگبري اروح وي القهر..
مارحم بيه الدهر....
يبني يحسين...يبني يحسين
( جواد كاظم الگرعاوي)
BY جواد كاظم الگرعاوي
Share with your friend now:
tgoop.com/jawadkr/5