tgoop.com/jawadkr/38
Last Update:
كل حياتك..نار وخيام وطفوف
كل حياتك..رايه ونحور وچفوف
خلصت ابونه خفيه
ياعليل الغاضريه...كل حياتك
---------------------------------------
مختصر قصة حياتك دمعه ضلت سايله
من تدونها الحقائق تبتديها بكربله
ضعون تمشي بوادي موت وغربه تحدي بعايله
عين كافل طفل ظامي يعني نبلة حرمله
بالحقيقه...ماعشت غير المصاب
بالحقيقه...دنيتك حزن وعذاب
ماشفت بس الاذيه
ياعليل الغاضريه...كل حياتك
---------------------------------------
ياحزن تنسه الجوارح لوبده ليلك يجن
وانت حتى النفس بيك يردد اهات الحزن
تنام عينك مانصدك لا ولا يغمض جفن
شلون تتهنه بمنامك سيدي وروحك تون
يامصيبه...تنسه ولياهي تنوح
يامصيبه...ومهجتك تنزف جروح
ماعشت ساعه هنيه
ياعليل الغاضريه....كل حياتك
----------------------------------------
لوشفت دم واضاحي بصدرگ يشح الهوه
وعينك تفارگ بصرها وينطفي بيها الضوه
تنادي كل مذبوح حتماً لابد يكون ارتوه
بس ابوي انذبح ضامي ولحضه وحده ماروه
ماتروه....حسين سبط المصطفى
ماتروه...وانذبح من القفه
ذبحتك هاي الرزيه...
ياعليل الغاضريه....كل حياتك
---------------------------------------
يعصر بروحك المها من تعاين للگمر
وعن ابو فاضل دموعك تنشد انجوم السحر
روحك اتفارگ جسدها وتعتني لشاطي النهر
تقبل اچفوفه وتگله محنتك تحني الظهر
يابوفاضل....عيشي بعدك مايطيب
يابوفاضل...لمثلك يكون النحيب
ولجلك دموعي جريه
ياعليل الغاضريه....كل حياتك
------------------------------------------
لوشفت نيران تذكر عمتك وحال الحرم
بيوم فرن كل خواتك من لهب نار الخيم
شتنسه يالوعه ومصيبه شتنسه ياحرگه وألم
وين ماتنظر تشاهد ذكرياتك كلها دم
ذكرياتك....سيدي حسره ودموع
ذكرياتك...خيل تسحن بالضلوع
وجثث مسلوبه ورميه
ياعليل الغاضريه....كل حياتك
-----------------------------------------
تلچم بجروح الاكبر لوزرت گبر النبي
وتوصل بونة دليلك فوك تل الزينبي
ترجع بلوعة مصابك تمشي بدروب السبي
تذكر اهات الخرابه وهظم سوط الاجنبي
يارقيه...تنادي ماتسمع مجيب
يارقيه....بس صدى نوح ونحيب
تعيش كل لحضه المنيه
ياعليل الغاضريه...كل حياتك
جواد كاظم الگرعاوي
BY جواد كاظم الگرعاوي
Share with your friend now:
tgoop.com/jawadkr/38