tgoop.com/jawadkr/36
Last Update:
يابارئ النسمه...
ياواسع الرحمه....
رجعلي الاكبر ضنوتي..سالم سالم
-----------------------------------------
ياربي بحسين الوجيه وهالمصيبه
ارحم دليلي ولهفته وبرد لهيبه
يالرجعت يوسف عزيز لعد حبيبه
الاكبر اريدك هالوكت سالم تجيبه
ارفع الك ايدي....
رجعلي اوليدي....
غانم وشوفه بحضرتي..سالم سالم
------------------------------------------
شفت الابو يصفك بديه بلايه حيله
بلحضه انخطف لونه ودمع عينه يسيله
گلي برزله الينحسب شخصه بقبيله
بس دعوتچ ياليله للاكبر وسيله
ادعيله بالدمعه...
رب العلا ايرجعه...
وبعيني اشاهد مهجتي..سالم سالم
------------------------------------------
ربي انت علام الخفايا وتدري بيه
ماعندي غيره وغيبته تصعب عليه
ياربي ردلي الاكبر الخاطر رقيه
مرفوعه اديها بدعوه وي اچفوف اديه
تتضرع وتدعي....
ربي ارحم بوضعي...
ردلي الينشف دمعتي...سالم سالم
-----------------------------------------
بهمومي ودموع المصايب ربي جيتك
وبلهفة ام مفجوعه مهظومه اعتنيتك
يارب احلفك بالنبي وبالگعبه بيتك
بحق فاطمه وحيدر علي ربي نخيتك
يالتعلم بحالي...
رجعلي الغالي....
منصوراشوفه بخيمتتي..سالم سالم
---------------------------------------------
بلطفك سلم من حوته يوم المحنه ذا النون
وبقدرتك موسى كليمك اردى فرعون
الاكبر وحيد بحومته بين اليكرهون
ربي بجلالك رده الي ياخالق الكون
ياصاحب القدره...
سدد علي بنصره...
ياربي لترد دعوتي...سالم سالم
----------------------------------------
ادريك احن من گلبي عالاكبر يحنان
وادري بعبادك يالهي انت رحمان
يامحسن اتقبل دعائي رايده احسان
منك تردلي الاكبر بلطفك يديان
ياخالق الاكبر....
رجع علي الاكبر....
ياربي وارحم حيرتي...سالم سالم
جواد كاظم الگرعاوي
BY جواد كاظم الگرعاوي
Share with your friend now:
tgoop.com/jawadkr/36