tgoop.com/jawadkr/22
Last Update:
قصيده ( الوداع) ليله عشره محرم
يليل ارحم دموعي ولوعه الروح..
تغيب اهلي وي نجمك لمن تروح....
مايسلم خدر...لوطر الفجر..لمن تروح
************************
زينب بروحي...شايله جروحي..ناذره عيوني وضواها..جيت لرض الغاضريه
الليله ياليلي..منهدم حيلي..مروعه ومحتاره بمري..من كثر هم العليه
بدمعه احزاني..انظر اخواني..الليله اخرليله يمي..وباجر تروح من اديه
ادري اضيعهم..من اودعهم..وداع عاشرمن محرم..وي اخوتي وداع المنيه
لون ترحل يليل تخيب الضنون..
واودع باقي عمري وي اليرحلون..
ناوين الهجر..لوطر الفجر..لمن تروح
***********************
اعتني بونه..واعتذر منه..باجر بعيني اني اشوفه..حسين من ينحز وريده
شلون اوفيله..بيش افيله..النار لوحرگت عباتي..وساحه الحومه بعيده
راح اودعنه..واگطع الضنه..بعد عينه اصبح غريبه..حالي جن حالة حميده
اجمع اطفاله..واگعد كباله..مثل سكنه اطلب وداعي..وفوگ راسي تمسح ايده
غريبه اصبح يليل ابين الاجناب
بعد شلي بحياتي عگب الاطياب
مايسوه العمر..لوطر الفجر..لمن تروح
*************************
بلوعه مصابي..ودمعه اعتابي.. اجمع اهموم الليالي..وللكفلني ارد اعتنيله
يمه اون ونحب..وارفع المعصب..خويه جيت الساعه اذكرك..هالخدر انت كفيله
دمعتي تسأله..العدها اخومثله..يصير وي اجناب تمشي..وتگطع دروب الطويله
شلون يرضالي..يشاهد خيالي.. العدوا واني اختهم.. واليسموني العقيله..
واخبره شگد بعدهم احمل الام
على ظهور الهزل يهدونا للشام..
شيكون العذر.. لوطر الفجر.. لمن تروح
***********************
شلون نتصبر..نودع الاكبر..وي الفجر متعني موته..يامحب ينظر حبيبه
بجمره المدمع..امه تتضرع.. وبگلب لاهب تنادي..يحرگ الروح بلهيبه
لاتخليني..دمعتي بعيني.. تدري يالماعندي غيرك.. لورحت ابقه غريبه
شلون اودعنك.. وابتعد عنك.. ابني وتروح من اديه.. الله واكبر من مصيبه
رحيلك ياوحيدي يكرب الموت
وتموت ايامي بعدك يبني بسكوت
واتمنى الگبر..لوطر الفجر..لمن تروح
**********************
بونه مسموعه..نعلك اشموعه..كل سنه بشمعه نعدها..من نوجهن شمعه شمعه
حنته بجفه..لمصرعه انزفه.. جاسم الميدان عرسه.. لوغدت امه تفزعه
ولامر من هاي..حال طفل وماي.. ضامي عبدالله دليله.. يلوع ياليل وتسمعه
يومي بأيده..ناشف وريده.. حرمله ينتظره باجر..منحره بسهمه يگطعه
شمس فجرك يليل تغير الحال
ولايرحم عدونه حتى الاطفال
من الناروتفر..لوطرالفجر.. لمن تروح
*********************
ماصفت دنياي..مره ساعه وياي..گلبي من گد ماتلوع.. صار مركز للنوايب
عيني ماتنشف..بعد يوم الطف..ابد ماتگطع دمعها.. من يرحلون الحبايب
بروحه الخوان.. اطب للديوان..واني بت بيت النبوه..اسكن تراب الخرايب
جان بين الناس..اسمي اخت عباس..يصير بعد الليله اسمي .. الغريبه ام المصايب
اموت بحزني والهم بعد الاخوان
ويضل گبري غريب ابين عدوان
بديار اليسر..لوطر الفجر..لمن تروح....
جواد كاظم الگرعاوي
BY جواد كاظم الگرعاوي
Share with your friend now:
tgoop.com/jawadkr/22