tgoop.com/jawadkr/20
Last Update:
اني اعتذرلچ سامحيني يم الحسين
ماعندي غير اربع بنين ودمعة العين
ماعندي اكثر...دمعي يتعذر
يم الحسين.....يم الحسين
--------------------------------------
ماتمنيت...بداري ضليت...يرحل حسين واضل وحدي و ي نوحي
ونة الليل...تهدم الحيل...تفزز نجوم السحر لوعه جروحي
صلفه دنياي ...ابچي بهداي....ماابوح بهمي بس للباري بوحي
خاطر يعود..وافرح اردود..الفاتحه اقراها يوميه عله روحي
اقراله ايات الحفظ بدموع العيون
لامايردلي حسين ابد تخبرني الضنون
گلبي تحير...دمعي ايتعذر
يم الحسين...يم الحسين...
----------------------------------------
ناذره اثنين...لنصرة حسين..كل بنيني وناذره لعيونه عيني
صح قليله... للعقيله...ولجل ابو الأكبر اضحي اربع بنيني
بداخلي صوت....لحفره الموت...ينادي يابضعه محمد سامحيني
اتمنى ياريت..بعشره ضحيت...هم احس لو عشره ماتوفيلي ديني
مديونه ضليت اني احس للحره زينب
ماوفي لوكل العمر خلصته انحب
شماحزني يكبر...دمعي يتعذر
يم الحسين....يم الحسين
----------------------------------------
اربع ابطال..مثل الجبال..ماتهزهم عاصفه اولاد الصميده
حشمتهم....ذكرتهم...بلايه دم وتضحيه اتموت العقيده
جعفر وعون...من تبرزون.. يروي عبدالله الطفوف بدم وريده
يابوفاضل..وانته كافل...لاتخلي زينب خلافك وحيده
وياها بس راس برمح من گصدت الشام
كافلها مافارگها ابد ماعاف الايتام
ضل جسمه بالحر...دمعي يتعذر
يم الحسين......يم الحسين
--------------------------------------
بگلبي جمره..بصدري عبره..وماتشيل اهاتي هالدنيا الوسيعه
محمله اهموم..روحي اتلوم... واستحي من حضرتچ ايالشفيعه
ماچنت يوم...حاطت الگوم... حاضره ومشتركه بهموم الوديعه
اسفه هواي...بشحة الماي...مارويت بدمعتي حسين ورضيعه
ماقبلت نحره وجبينه بيوم الوداع
ولاضللت جسمه بعباتي وهو عالگاع
يوم التعفر...دمعي يتعذر
يم الحسين...يم الحسين...
------------------------------------------
ماشفت نار..بعتبة الدار...ولاركضت ابهيمه من حرگوا خيامي
ماعشت خوف..وادي الطفوف.. ولاشلت عبدالله بيدي وهو ضامي
ماتطبر..گبالي الاكبر.. ولارجعلي جاسم من الحومي دامي
ولاشفت راس..ابني عباس.. ولانضرت الخيل من سحگت امامي
لاماعشت هاي المصايب يم الاطهار
ولاگلبي ذاب من الهظم يوم الضعن سار
لمن تيسر......گلبي يتعذر
يم الحسبن...يم الحسين..
-----------------------------------------
حال العيال..بلايه كفال...زود جروح لجروح الغاضريه
زينب بنوح...للسبي تروح...واني ماروح وي بت حيدر سبيه
وي الحرم كون...بضرب المتون...هناك واشگف عنهم اسياط ال اميه
وحمل آلام...محنة الشام....بالخرابه ريت اموتن وي رقيه
بعيوني ماشفت السبي ودمعات الاطفال
ولابيدي مثل ام الخدر مشدوده الاحبال
ولاجدمي يعثر...دمعي يتعذر
يم الحسين....يم الحسين...
جواد كاظم الگرعاوي
BY جواد كاظم الگرعاوي
Share with your friend now:
tgoop.com/jawadkr/20